「搞乜鬼你塊面咁多雀斑？」雖然有人話雀斑好卡娃兒，但殘酷嘅現實係要睇吓閣下究竟咩年齡咩質素，要急救除咗狂搽護膚品，亦可以靠食多啲士多啤梨自我救贖。今期美國士多啤梨當造，價錢唔貴仲可以減淡雀斑、改善皮膚粗糙，入饌最啱，諗得過噃！
記者：陳慧茵
攝影：陳偉強
Model：Daisy,Hidi@Salvador
示範：溫嘯海@StrawberryForever（23803828）
地址：旺角新世紀廣場1樓116-118舖
鳴謝：美國加州士多啤梨協會
草莓法式疏乎里奄列 蛋白要打至企身
聞煮價：$10/2人
需時：20分鐘
最關鍵係拂蛋白，要打至企身，倒轉個盤都唔會漏瀉嗰隻，懶人/聰明人可以搵攪拌器幫手，效果絕對專業級水準。
有料到
雞蛋2隻（淨取蛋白）、士多啤梨4粒、糖、奇異果適量、牛油少許
聞煮法
1.士多啤梨切蒂切粒，加小量糖略醃15分鐘；2粒士多啤梨加適量糖略煮成士多啤梨汁備用；
2.蛋白加入糖打起，放入唧袋；平底鍋加熱後落牛油，將蛋白平均唧上平底鍋，慢火煎至金黃色；
3.士多啤梨粒連汁放蛋白上，反起即成奄列，奇異果切碎拌碟即成。
聞煮貼士
蛋白要打至起泡先夠軟熟，想更易打起記住先將蛋白雪一陣呀！
煙鴨胸士多啤梨薄餅 抵食任你變
聞煮價：$15/1人
需時：20分鐘
喺屋企都可以整薄餅，只要有焗爐就乜都得，買個細細哋嘅餅底，配搭仲可以自由發揮，士多啤梨加鴨胸，材料易買，味道出奇匹配，價錢仲好平，比嗌外賣化算得多。
有料到
酥皮薄餅餅底1個、意大利茄醬、香草少許、煙鴨胸、水牛芝士適量、士多啤梨2粒（切片）
聞煮法
1.餅底以200℃焗5至10分鐘，塗上茄醬、鋪上芝士碎、煙鴨胸及士多啤梨片；
2.再撒上芝士，加香草，以200℃火焗5至8分鐘即可。
聞煮貼士
千祈唔好將茄醬開稀，稀身茄醬會滲入餅底，焗出嚟嘅就會唔夠脆㗎喇！
士多啤梨脆香千層酥 睇落好Pro
聞煮價：$15/1人
需時：30分鐘
士多啤梨賣相咁Cute咁搶眼，女仔實Buy，難怪一直係甜品首選，千層酥其實唔使調味唔使拂蛋拂到手軟，但睇落好Pro，買嚟傍身一流。
有料到
千層酥皮1塊、士多啤梨4粒、吉士、朱古力漿、糖霜醬適量
CreamCheese加料：攪勻現成CreamCheese2安士、吉士2安士、已打起忌廉1安士
聞煮法
1.士多啤梨切蒂開邊備用。千層酥皮以150℃火焗25分鐘，將酥皮切成3塊3×3吋正方形；
2.酥皮唧上CreamCheese，排上4片士多啤梨，重複步驟一次；
3.蓋上最後一塊酥皮上，唧上吉士及朱古力漿，面層撒上糖霜即成。
聞煮貼士
酥皮放入焗爐前要先用牙籤拮幾個小窿，否則焗時脹起就好難鋪材料喺上面㗎喇！
士多啤梨雞翼 賣相最省鏡
聞煮價：$11/2人
需時：15分鐘
筆者已經對豉油雞翼極度厭倦，今次用士多啤梨煮，酸酸甜甜夠開胃，賣相省鏡，老媽子，呢味菜單專誠益你㗎！
有料到
雞翼4隻、士多啤梨3粒（其中2粒用作煮士多啤梨汁）、牛油半安士、水1安士、糖2茶匙
醃料：蒜茸、花椒粉、鹽、糖、雞粉少許
聞煮法
1.將1粒士多啤梨切粒；雞翼以醃料略醃，然後落鍋炸熟，瀝乾油份備用；
2.加入其餘士多啤梨、水及糖略煮，放入牛油及雞翼以大火快煮至醬汁收乾；
3.加上士多啤梨粒拌勻即可。
聞煮貼士
牛油煮得耐會影響賣相，臨熄火前略煮取其香味最好。
公開！士多啤梨入饌秘訣
1.唔可以煮得太耐
士多啤梨愈煮會愈酸，加上容易煮溶煮爛，所以要最尾先落。
2.加糖調味
士多啤梨味道偏酸，加啲糖或者牛油吊味，可令酸味減低。
3.配肥膩嘢最好
酸酸哋嘅士多啤梨可以中和肥膩感，配煙鴨胸、鵝肝等同食最啱！
