滙豐噚日舉行咗個青年企業家獎亞太區總決賽，志在培育亞洲區未來的商業領袖人才。結果由馬來西亞的大學生取得榮譽大獎，而代表香港嘅港大學生隊，則獲得最佳演繹大獎。
呢個獎已經第6屆，對象係香港、馬來西亞、菲律賓同泰國嘅全日制大專學生，共有642支隊伍共1700多人參加，都好盛大；噚日總決賽仲請得香港滙豐總裁邵銘高，及泰國、馬來西亞同菲律賓大企業嘅主席或總經理做評判。邵銘高話，希望呢個獎為學生提供一個發揮創意同學習實際商業知識嘅平台，過去6年已有逾7300名大專學生參加過。
4個國家地區嘅得勝隊伍，除咗每隊獲得3萬元獎金，同參加在港舉行嘅總決賽外，仲可以免費到美國加州柏克萊大學校外進修部，參加為期一周嘅「未來企業家之旅」，認識美國最新嘅科技同商業發展，參觀Gap同Google等大企業，獎品好豐富。