國泰忙完一輪，終於上周五落實買起港龍航空，獨霸香港航空市場，咁啱今年9月係國泰60歲生日，正好大事慶祝一番。國泰行政總裁陳南祿噚日請傳媒食晏，華華建議祿哥搞周年活動，最好與民同樂，玩問答遊戲送頭等機票，唔係人人都坐得起頭等嘛。
祿哥聽落都覺得有得諗，仲即刻諗到個遊戲，話不如叫人估吓國泰9月24日生日當天，總共有幾多乘客。但當日係星期日，客量同平日未必一樣，訂咗位嘅人又有機會改期或甩底，都幾難估中，有難度。
借大壽搞慈善
華華認為除咗送禮，亦可以將慶祝活動與慈善掛鈎。因為國泰買起港龍之後，總係畀人壟斷市場嘅感覺，如果借慶祝活動做善事，實際地益吓香港人，都係建立社會形象嘅一個好機會。陳南祿身兼公益金董事，又多計仔，應該有計嘅。
忙完大deal，國泰最近主要忙住訂做空姐舊制服，大公關黃家倫早幾個月都講過，國泰為慶祝今年嘅大壽，打算響8至9月，安排飛機上三分之一嘅空姐，着番國泰過去60年嘅制服，總共有9個款，大概訂做2000套。聽講選擇迷你裙款嘅空姐都幾多，乘客到時就可以順便睇埋佢哋嘅制服時裝騷啦。
李華華