侍仔：去完大陸返嚟啦？仲要着住件過氣南韓波衫！
菠蘿文：過氣無問題，最緊要平。呢件係大陸嘅老番，280蚊有一套，幾抵㗎。
招積域：成3舊水買件假嘢，你又幾好呃㗎喎。
菠蘿文：價錢同正價差咁多，你唔係買正版掛？
招積域：係呀，我啱啱先買咗塞黑新版主場作客波衫，唔似你咁老土，貪平買舊貨。
菠蘿文：我唔理，今晚着住呢件撐南韓贏多哥，再串巴西W同瑞士下盤。
招積域：條飛睇落都幾正路喎，多哥教練辭咗職，克羅地亞班友先排又食物中毒，瑞士受讓半/一又真係值博。
侍仔：南韓同多哥水鬥水，前排睇熱身賽，南韓仔都唔係踢波嘅，亂咁嚟。我就唔玩呢場啦。
招積域：我反而專注玩巴西嗰場，會買入球「大」、巴西「主勝」同2:0、3:1波膽，始終係衛冕冠軍，頭炮點都要響。
菠蘿文：聽講你噚日同個日本人嘈喎，今日見唔見佢喺度？
招積域：未見佢落嚟喎，如果唔係同佢saysorry啦，噚日係咁鬧佢。
侍仔：我都俾你累死啦，幾驚佢喺我個場搞事！
招積域：中村，今餐我請你，兼俾貼士，當係我賠罪。
中村英壽：多謝晒啦，我自己都有心水，瑞士勝法國2:1，信不信由你。
招積域：17倍波膽你都博？好有信心喎。
中村英壽：當然，瑞士似足希臘，穩打穩紮，又有哈根耶根補選入伍；法國係強弩之末，無運行。
文：高洛文