世界盃開鑼，股市成交果然縮晒，噚日只得230多億，比上周五唔見三分一，比上周四幾乎唔見咗一半。大市淡靜，行情亦在窄幅內上落，恒指最多跌過130點，亦升過50多點，收市15621，微跌7點；期指則升10點，低水收窄。
經過個多月跌市，好多股票嘅價位都唔見咗一截，家吓入市博反彈，或者作中線持有，都諗得過。今年初，推介理文造紙（2314），當時股價係8.7元，5月中，升上高價13.75元，升幅58%，4個月時間，有交代。
理文造紙股價其後出現調整，6月初落到10.4元，噚日上番11.35元，調整應已完成，又可以吼位再上車。
理文造紙早輪股價可以升咁多，當然唔可以排除玖龍紙業（2689）上市帶動嘅因素。今年3月，玖龍以每股3.4元發售10億股上市，掛牌後股價曾高見7.25元（升113%），近一個月來，股價反覆回落到5.7元水平。
大行目標價17元
理文造紙主要製造牛皮箱板紙及瓦楞紙，係繼玖龍之後的中國第2大箱板原紙生產商，由於目前內地箱板原紙市場需求極殷切，過去５年，每年增長15%，玖龍同理文造紙即使不斷擴張，但未來3年，市場仍係供不應求，前景非常樂觀。
理文造紙現時有7條生產線，第8號明年首季可投產，另外第9號至第11號的3條生產線，預期亦可在08年安裝完成，屆時年產量將倍增至逾300萬噸。
06年度（3月結算），估計理文造紙盈利可達6.3億元，升50.7%，每股盈利0.65元；07年度可升到8億元，每股盈利0.83元。瑞信集團嘅研究報告睇得好好，話理文造紙未來3年複合增長率達39%，其08年度盈利可達11.9億元，維持「優於大市」投資評級，目標價更調高到17元。
大市大幅回落後，好多時都見大股東增持，顯示信心，結好控股（064）主席近日就買入1950萬股，平均價係0.603元，持股量由30.15%上到32.12%。結好3月結，照計7月中之後就會宣布業績，之前1個月唔准做嘢，大股東今次趕緊加碼，應有玄機。
郭兆誠