現年83歲嘅華人諾貝爾物理學獎得主楊振寧，04年時同細佢54年、家吓先29歲嘅碩士女生翁帆結婚，引起社會各界嘩然。轉眼一年半，大學界盛傳佢哋近排孕育出愛情結晶品，有人話楊太翁帆已經有咗幾個月㖭！
楊振寧同第一任太太杜致禮結婚後生咗兩個仔、一個女，可惜太太03年因癌症去世，當時楊老非常傷心，好唔容易先至畀佢遇到佢心目中嘅再世女神翁帆，楊振寧仲同全世界講，話翁帆係「甜蜜的天使，妳真的就是上帝恩賜的最後禮物，給我的老靈魂，一個重回青春的欣喜」。
佢同翁帆由忘年戀至結婚，已經令各界嘩然，𠵱家又傳楊太有喜，如果係真，就真係轟動全球。雖然有啲人質疑，楊教授咁大年紀係咪仲有心有力？八方問過吓啲婦科醫生，佢哋話雖然男人大咗生育力無咁強，但係身體好嗰啲，都仲可以生BB㗎！又好似85歲嘅澳門賭王何鴻燊，佢都年紀唔細，但生育能力非常之強，四個老婆總共幫佢生咗17個仔女，最細個細路都係十幾歲。數番轉頭，賭王當時都成六十幾、七十歲，都一樣得，楊教授年紀都係大少少啫，都咪話無可能呀！
雙雙喺美國歎世界
八方曾經向一位同楊振寧關係密切嘅大學界人士打探，呢位大學高人同八方講，呢啲係楊振寧嘅私事，所以就算知都唔會透露喎！大學界高層仲話，有人亂傳話阿楊太已經生咗個仔㖭。不過幾肯定呢個係流料，因為八方早幾個月先喺又一城見過楊生楊太，兩個人十指緊扣咁去行街街買影碟，當時楊太都未見肚，又點會生咗個仔出嚟呢？
既然大學界傳得咁行，咁當事人點解又唔嚟正吓視聽？大學高人話楊振寧雖然係中大物理系講座教授，但呢排大家都無見過佢，只係知佢兩公婆𠵱家喺美國享受緊人生。八方多手寄咗個電郵畀楊教授，話恭喜佢又添丁，可惜等咗好多日都冇回覆，仲未可以好開心咁同讀者報喜㖭！
爆料熱線：29290000、27860099
報料傳真：26239278
報料電郵：[email protected]