南韓響上屆世界盃佔有主場之利，加上有神奇教頭希汀克帶領，先後擊敗西班牙同意大利兩支歐洲勁旅殺入4強，成為世界盃歷史上亞洲球隊成績最好嘅一隊，但今屆冇咗以上兩大條件，就唔同講法。
讓球主勝博得過
南韓響今屆外圍賽雖然表現只屬一般，以小組次名出線，但睇番佢哋近期喺友誼賽，當中對過3支非洲球隊，錄得1勝1和1負，有助南韓更加認識非洲球隊嘅踢法。
多哥首次晉身世界盃決賽周，論經驗同整體人腳都比較差，前線數糊人物只不過係阿仙奴嘅艾迪比耶，睇番佢哋響年頭喺非洲國家盃表現，3場全部輸晒，咁嘅表現又點揀得落手？一於半個博一個揀讓球主勝。
另一場心水係巴西對克羅地亞。巴西有幾勁相信唔使我多講大家都知，響F組直頭超晒班，但係睇過千里達喺少踢一人嘅情況下，都可以摸和瑞典，相信巴西響頭場都唔會咁輕敵，話晒克羅地亞都係同組除己隊外最有份量嘅球隊。
森巴兵未必大勝
雖然克羅地亞響外圍賽以不敗之身殺入決賽周，實力不容忽視，不過近兩場熱身賽都要輸畀波蘭同西班牙，表現認真麻麻，今場重要對住5屆世界盃冠軍巴西，就更加冇運行。估計巴西首場未必會大開殺戒，穩陣起見揀主客和嘅主勝。
陳樹鵬（阿鵬）
有線球彩台主持
電郵：[email protected]