估唔到，今屆世盃荷蘭又「出事」！雖然荷蘭第1場撼塞黑3分拎晒，但球隊似乎又重演呢幾十年面對嘅問題，就係內部決裂！
周日賽後，同洛賓、雲尼斯達萊一齊打3箭頭嘅尹佩斯第1個企出嚟噏嘢，講明唔妥洛賓，仲話世界盃唔可以靠佢1個人拎番嚟！佢話：「洛賓一定要理吓其他隊友，但佢好多時嘅決定只諗住自己。」從表現睇，洛賓喺場上的確扭波多過交波，有冇空位都諗住射波；之但係隊友不斷交個波畀佢發辦，都係其中嘅問題所在。
教練尹巴士頓就冇正面回應「獨扭」事件：「𠵱家球隊係有啲唔平衡，但我哋將會盡快處理問題。」尹巴士頓冇鬧洛賓，反而批評老大哥雲佬不濟，仲表示雲佬係因為表現唔到水準，所以先換走佢出場！
事件主角洛賓當然有嘢講，但佢亦只係覺得球隊應將注意力放喺下仗對科特迪瓦身上，同埋世盃係高於一切個人利益！判官當然希望風波盡快冇事，因為做球迷無非係睇好波啫！
判官話
告魯夫已經話畀全世界知，世上就只有荷蘭人可以「擊敗」荷蘭人，希望尹巴士頓可以搞番掂呢單嘢啦！
內訌指數：★★★★
註：以5★為最高
專家話：尹佩斯亂噏必受靶
「從比賽所見，洛賓確有可畀不畀情況，但教練看到是可透過溝通解決，只是尹佩斯公開批評隊友，可能令球隊陷困境及出現矛盾，相信教練會『處理』尹佩斯，而尹佩斯因此可能不再獲重用。」
曾偉忠(港足隊教練)
網民反應：洛賓獨食眾人皆見
「洛賓扭唔係問題，但佢已經接近死扭；班隊友又衰，將個波交晒畀佢，尹佩斯轉來轉去唔知做咩！」「洛賓想表現畀全世界每1個人睇自己的實力，但佢用嘅途徑就錯咗咯！」