聽聞不少國家隊教頭，喺決賽周會向球員下達禁慾令，費事佢哋喺比賽前一晚發洩完，到第2日喺球場上扭幾吓波之後，個個都變咗隻軟腳蟹，到時咪有心無力咪弊？就好似墨西哥國家隊咁，嚴禁球員喺比賽前48小時同比賽後有性行為；不過佢哋可以喺指定時間同honey見面，班教頭可謂用心良苦囉！
不過正如萬世師表孔子話齋：「食色，性也。」呢啲係人性嘅基本需要啫！賽前個個球員都操到咁鬼fit，有時精力過剩，你叫佢哋去邊度發洩啫？睇鹹碟雜誌？有時都唔係個個好呢味嘢。
巴西教頭彭利拿同英格蘭主帥艾歷臣就深明此道，冇禁止球員賽前交歡。不過我認為最好嘅方法，就係贏咗波可以免費狂歡5日，輸咗就禁慾1個月。睇怕班球員有明確目標，喺球場都會走得落力啲。
彭浩翔
電影導演