世界盃效應開始在股市浮現，昨日所見，大部份散戶均無心炒股，講波多過講股，連打電話向大行老友索料，佢亦話冇乜好買，等世界盃踢完先至多人做嘢。
港股昨日似乎冇乜方向，初段跟隨外圍低開，最多跌過130點，其後跟隨日股反彈，最後微跌7點，全日成交只有232.8億元，但沽空仍高達19.5億元。
窩輪商唱淡建行
倉內的建行（939）昨跌1個位，收3.325元，已跌至三角形的支持軌。上周六提過建行三角形待變，看來向下突破的機會頗大。因近期陸續有窩輪發行商唱淡建行，並叫散戶留意建行認沽證。佢哋嘅分析亦係建行跌穿3.30水平的支持位，將下試4月尾低位3.20元。
睇昨日盤路，中資金融股最多人沽，再睇昨日沽空金額，中行（3988）高達4.3億元，而國壽（2628）及建行（939）各有1.5億，而交行（3328）亦有1.1億元。上述4隻中資金融股已佔大市總沽空19.5億元的43%，反映大戶正在做緊嘢，窩輪商唱淡建行唔係齋噏。
趙飛雲一向有留意窩輪發行商主打推介窩輪嘅表現，通常佢哋睇相關正股走勢相當準，而且主打推介嘅相關窩輪亦較跟貼正股走，唔大貪跟坐半程順風車亦間中有收穫。不過，如果建行只係跌至3.20元就企穩，則值博率不大。
倉內有12萬股建行，原本用作墊倉底，作中線持有，但睇見大戶來勢洶洶，若建行跌穿3.325元，亦會先沽出計數，候3.20-3元水平補回。
此外，讀者若持有其他中資金融股，亦須留意走勢會否進一步轉弱，如果持貨過多，不妨考慮減持避一避鋒頭，看有否機會在低位補回，就算持中長線亦宜保持一定主動權，唔好只係捱打。
趙飛雲