周日葡萄牙雖小勝世盃新丁安哥拉，不過見到費高仍然老而彌堅，我世盃判官都要送個「勁」字畀佢。場波費高好似後生咗10年咁，完全唔似1個33歲老將，開波冇耐佢竟然可以喺落後對手4、5個身位之下，推右走左用速度壓過後衞，再傳中畀保列達射入，直情嚇到我以為睇緊10幾年前嘅費高踢波。賽後費高獲選比賽最佳球員，我判官都覺得係實至名歸。