喺長實打咗30幾年工嘅前高級營業經理何雨盈，人稱「何伯」，舊年退休後，憑住多年喺地產界打滾嘅經驗，投資咗唔少物業。雖然近排市道唔多好，但何伯持有嘅一個北角城市花園單位，就啱啱以620萬賣出。
聽世紀21經紀黃文龍講，何伯個單位係10座中層A室，1168方呎，係佢喺舊年用560萬元買入，持貨1年半賺咗60萬元。
𠵱家何伯重揸住個城市花園7座E單位放緊盤，買入價係655萬，叫價就要750萬。
何雨盈放盤賣樓，識高調地自己搞記者會向外界宣傳，同一般淨係將個單位放畀地產代理行搞掂好唔同。
可能，何伯太熟悉老本行，深知宣傳曝光嘅道理，早排重識得將單位交畀賣拍行拍賣，窿路多多。
至於買何伯個單位嘅買家，原來買埋隔籬個723呎F單位，打通做相連戶。