經過頭3日賽事，賽果雖然有冷有熱，不過尚有一個共通點，就係4支分組賽種子隊德國、英格蘭、阿根廷同墨西哥都可以全取3分，今日就有2支種子隊法國同巴西登場，兩隊仲係近2屆王者，唔貪心整條種子隊贏波過關2串1，都有2.4倍。
小弟另文已經有講撐法國嘅理由，所以本欄就講多啲巴西。巴西真係今屆賽事嘅超班馬，朗拿甸奴、卡卡兩個都係當世最勁進攻中場之一，左右開弓已經足以令克羅地亞頭都暈，肥哨朗拿度雖然近期「頹吓頹吓」，不過呢位仁兄打大賽最醒神，講真克羅地亞重要靠羅拔高華、史米等老人家，況且佢哋喺球會連正選都冇，點畀到人信心呀。
既然巴西贏梗，1.4倍主勝穩執，係唔係應該博埋巴西贏2球或以上，揀埋讓球主客和「主勝」呢？小弟就唔會咁貪心，事關佢哋後防老化，失球難免。
巴西今年防線真係有問題，卡富同卡路士已經唔係早4年個對快翼，迪達又係「計時炸彈」，隨時巴西領先2球下，完場前輸番粒，開個讓球「和局」就慘啦。講真克羅地亞前鋒好似柏素、卡斯歷都大大隻，頭槌有番咁上下，入到波一啲都唔出奇，博個1.8倍入球大好過啦。
多哥熱慣可破韓兵
同日有亞洲之虎南韓登場，大家都係亞洲人，讓平/半係咪應該支持吓呢？小弟就有另一番睇法，今場打日波，近期德國天氣已經熱咗好多，打日波好多球隊到咗比賽尾段就「莫」晒氣，連伊朗都臨完場連失2球，輸畀墨西哥，來自非洲嘅多哥，肯定熱慣，懶埋佢近日換帥不利傳聞，捧硬下盤。
文：牽牛