今屆世界盃熱門之一法國終於出場，分組賽首戰就迎上可能係同組最強敵人，兼外圍賽老對手瑞士。德國當地賭波公司有資料顯示，法國隊日日有飛，有莊家已經怕咗呢支98年冠軍隊；法國W信得過，「半全場」「主主」出擊可也。
每日入紅燈區睇賠率
華度喺法蘭克福市紮營，每日只要係去其他城市睇波，幾夜都要返去呢個德國交通樞紐中心，搵周公養好精神。基本上辛勞咗一日，都會好似香港上班族咁，搵間酒吧啤啤佢，兼且睇波；更重要嘅係，法蘭克福火車站對面喺紅燈區凱薩大街，除咗酒吧，仲有……博彩公司！
咪諗邪嘢，華度喺香港有老有嫩，又細膽，絕對唔敢越軌。淨係去吓博彩公司，睇吓當地莊家每日最新賠率走勢。
暫時開熱門居多
凱薩大街芸芸博彩公司當中，Goldwetten及Penalty兩個莊家服務都算唔錯，好似華度呢啲一角幾毫雞仔注，志在搵餐晏仔，照樣受理；去多2次，個櫃面哥仔阿Jorg，已經識得第一時間畀份每日最新盤紙過華度。呢日仲同華度講，由於今屆賽事似乎幾利熱門球隊，令到法國隊呢幾日不斷有飛到；但唔似得之前墨西哥同荷蘭，係咁俾人煲個賠率都無乜點郁。莊家已經調整咗法國隊W賠率，有計！ 文：華度
採訪隊推介
華度心水：法國對瑞士半全場：主主