以埋單指數計，昨日個市屬於微風細雨，恒指只係唔見7點，H指冇咗37點（不過0.6%）。但輪市則唔係咁計，跌少過20%嘅輪，都唔能夠打入50大跌幅榜。
炒輪難搵食，在於贏時贏唔足，輸就輸足有餘。譬如話，指數或相關股票升1%，揸C輪應該贏10%，但實際只贏得8%，揸P輪應該輸10%，實際則輸夠12%。
賭吓賭吓，就算運氣平均同眼光平均，10萬銀好快得番5萬，然後加埋唔高唔追，唔低唔掟，剩番嗰5萬蒸發到得番2萬。
太AC輪2170：太A（019）升5%，恒指成份股最靚係佢。太A嘅C輪升幅由29%至128%。𠵱家最值得博嘅係2170，但睇吓全日成交金額得62萬，嘥氣啦。
中移動C輪3612：中移動（941）收41.40元，升0.30元。過去14日，中移動有7日試過跌到40元上下即反彈，博攤路翻版，中移動再下試呢個位之時，買C輪博反彈。如果係賭仔性格，向3598埋手，如果想贏輸冇咁刺激，則諗吓3612。
平保C輪3782：平保（2318）升0.15元，收19.90元。C輪3782升4.7%，呢隻係高危輪，10月尾到期，輪價20.1仙，溢價30.7%，槓桿率9.9倍，有效得4.1倍，而引伸波幅則去到67%。想同荷包過唔去，買3782啦。
章盛