晶門科技（2878）受到多間大行調低評級，股價近期跌到散晒，上周四低見1.84元，但昨日突急升8.97％，收2.125元，而且成交金額高達7861萬元，唔似係技術反彈咁簡單，故此小初四圍問點解。
經紀黃查探歸來話，原來又係有大行玩彈弓手，上月中最早出報告叫人沽售晶門的德銀，見隻股跌咗咁多，認為所有壞消息已經反映，於是又出報告調高晶門評級至買入，昨日受到有關消息刺激，晶門股價急彈。
德銀轉軚叫買
德銀上個月叫沽晶門時，晶門股價大約係3.40元左右，原因係來自摩托羅拉定單少咗，銷售放緩令邊際利潤受壓，由嗰陣開始，晶門股價就好似食咗瀉藥，跌到好似三四線神仙股。
雖然今次德銀調高晶門評級，但就調低每股盈利預測，連帶目標價亦由上次的2.70元下降至2.50元，但點睇都高過現時市價，所以有芬佬認為現價博得過，一於買番轉頭。
慕容小初