曾五奪世界盃冠軍的球壇一哥巴西，於香港時間明日凌晨三時首度在今屆世界盃登場，於F組決戰克羅地亞，論實力、數球星都比對手高幾班，巴西首仗要敲響勝鼓並無難度。娛樂圈也有不少巴西擁躉，分組賽事未進行，已經力撐愛隊有機會再度蟬聯冠軍寶座。周星馳、陳慧琳（Kelly）、葉璇和李彩華等，昨日更一面倒支持實力雄厚的巴西。 採訪：比華利、陳月媚
周星馳 整體出色
「咁多球隊之中，我係比較認識巴西，因為巴西係足球名國，擁有咁多世界級嘅球員，佢哋成隊波整體配合得好好，相信佢哋同克羅地亞對壘應該會贏嘅！」
李彩華 技術超卓
「我最鍾意嘅球星係巴西嘅朗拿度，佢雖然今季肥咗少少，但佢嘅球技真係好吸引，次次佢出賽我都一定會支持，仲會擔定櫈仔坐定定捧場㖭。世界盃熱潮唔單止係男性球迷嘅世界，好多媽咪級球迷都支持，我今次都受氣氛影響睇多咗。」
陳慧琳 娛樂性強
「我力撐巴西隊，因為佢哋成隊波有好多精英分子，好似有朗拿甸奴同朗拿度，佢哋除咗喺球場上好有魅力之外，打贏波又會跳森巴舞，所以睇佢哋踢波，除咗好刺激之外，又充滿娛樂性。」
葉璇 星級之選
「我睇好巴西，佢哋絕對係球場上嘅大哥，每位球員都訓練有素，夠晒專業，每次落場都好投入，好有衝勁。我喜歡嘅球員有中場嘅朗拿甸奴同卡卡，朗拿甸奴經驗老到，而卡卡年輕又有型，個個都係球場上嘅明星。」
廖碧兒 默契煞食
「巴西隊我鍾意嘅球星有朗拿甸奴、朗拿度同卡卡，巴西球員之間好有默契，互相又支持對方，佢哋又係實力派，我梗支持佢哋。加上我好鍾意睇朗拿甸奴喺球場上跳舞，好cute，佢哋嘅球衣又sharp又靚。」
向海嵐 教練有料
「我認為巴西對克羅地亞贏面好大，因為巴西隊波好多猛將，好似有朗拿甸奴同卡路士，佢哋嘅球賽經驗都好充足，加上有教練彭利拿嘅領導，相信巴西隊絕對有機會贏第六次世界盃冠軍。」
應采兒 熱捧偶像
「朗拿甸奴係我嘅偶像，我梗係捧硬巴西隊啦！呢隊最有冠軍相，個個都咁好波，睇佢哋踢波係賞心樂事，呢隊世界盃奪冠大熱，我諗佢哋對邊隊都冇問題，實力咁強，場場都surewin啦！」
張家輝 陣容超班
「巴西同克羅地亞兩隊強弱咁懸殊，梗係巴西贏啦！睇佢哋嘅軍容咁勁，好波球員多到瀉，連後備球員都勁過人哋嘅正選球員，有朗拿度、朗拿甸奴、羅賓奴、卡路士同阿祖安奴，睇佢哋踢波簡直係欣賞緊藝術表演。」
