呢10年嚟全球瀰漫保健氣氛，唔單止食嘢要健康，就連打機娛樂都要用運動嚟包裝。繼任天堂年尾部Wii大Sell「SportGame」、寓打機於KeepFit外，連日本SSD都出番部玩多樣化體感嘅運動遊戲機；除咗又跑又跳幫助瘦身外，仲識得計卡路里、提出運動建議㖭。主機同遊戲各自都係幾百蚊有交易，使乜花幾萬蚊去收身咁重皮呀！
記者：陳國輝
攝影：何家亮
ImageGirl：Kibby（LB）
早前，本港亦出現過單一體感遊戲，好似《龍珠》同拳擊遊戲等，但口碑麻麻。自從任天堂喺E3公布咗Wii之後，意味體感遊戲將成為未來大趨勢。呢次XaviXPORT食正體感熱潮，掟走手掣改以拳套或球拍等形式操作，直接面對面同電腦切磋，真實感爆晒燈！
配件認真手感佳
玩體感，梗係要飛走傳統手掣啦！XaviXPORT比Wii更抵讚嘅，係完全唔使駁線，齋憑主機感應器就可連接專用配件，玩起嚟感覺更逼真！好似打Boxing咁，佢就只利用拳套上嘅反光位便可感應動作，連筆芯電都慳番；而遊戲配備方面亦好大陣仗，例如打高爾夫球就配備一支長杆，一支推杆及一個Set波底座，落玩勁好手感！
打保齡考判斷力
運動量＊＊＊＊
$498（推出日期未定）
如果唔鍾意咁大動作，不妨試玩呢一隻Game。可惜玩法略欠創意；特別一提係，玩嗰陣記得將條繩箍實隻手，唔小心Fing咗個波出嚟就認真大鑊！
喪打天馬流星拳
運動量＊＊＊＊＊
$598（已推出）
最刺激嘅首選一定係《PowerBoxing》！唔單止有左勾拳、右勾拳等攻擊招式，當你儲滿氣之後，仲可使出如「天馬流星拳」嘅連打絕招，難怪有玩家表示會打到手軟，果然冇錯！
陪成龍跑街
運動量＊＊＊
$798（7月中推出）
玩法類似KONAMI跳舞毯，根據唔同節拍即出現唔同嘅舞步；另外仲內置一款跑步兼避過障礙嘅MiniGame，據講意念由成龍自己構思，玩落有幾分親切感。
打高球架生逼真
運動量＊＊
$698（推出日期未定）
Golf呢類體感遊戲查實早就見識過，但今次明顯玩得更專業，跟遊戲帶除咗有打遠球專用嘅長杆，仲有一支直打入洞嘅推杆，勁考玩家嘅集中力和思考力。
發球練臂肌
運動量＊＊＊
$498（已推出）
玩單打或雙打都好流暢，只係距離感令玩家冇咁易掌握；特別一提係遊戲提供發球練習，增進開波技巧外，仲可鍛煉手臂肌肉。
小知識
由於部份XaviX遊戲帶配備Sensor關係，有時會出現感應不良問題。要解決呢樣嘢唔難，其中方法就係避免將Sensor直接對住射燈，因為Sensor對強光特別敏感。
商場路人爭玩
小記到海港城採訪當日，不斷有路人過嚟試玩，當佢哋拎起拳套嗰陣，直頭成龍上身一樣，玩得極度投入！
記者意見
查詢：China（FarEast）DistributionLtd
電話：28680188
