無綫高收視資訊節目《向世界出發》決定添食，不但觀眾反應熱烈，連藝人也踴躍報名，下月曾志偉便會打頭陣到汶萊皇宮取景，拍攝當地酒池肉林的生活。無綫更計劃邀請纖瘦的張栢芝到訪埃塞俄比亞，而阿旺郭晉安認為節目製作甚有深度，希望可以到埃及探討古文明。
無綫月前推出的資訊節目《向世界出發》叫好又叫座，最高收視有31點（即約有199萬觀眾），打破了無綫非戲劇節目自97年以來的最高收視紀錄，由於觀眾甚至贊助商均反應熱烈，有關方面即決定再次向世界出發，新一輯節目更會加強嘉賓陣容。
下月開拍
直擊汶萊皇帝慶生
據悉，無綫邀請了曾志偉、張栢芝、汪明荃、鄭少秋、葛民輝、郭晉安、譚詠麟、林保怡、林敏驄及馬德鐘擔任新一輯嘉賓，分別前往以色列、汶萊、古巴、韓國、內地、埃塞俄比亞及其他非洲國家等地方拍攝。初步落實志偉到汶萊，張栢芝則前往埃塞俄比亞，蔡少芬到以色列，而葛民輝會到非洲一個古怪部族取景。
記者昨日致電《向世界出發》監製鄧婉媚了解詳情時，她說：「我哋係好有興趣搵栢芝去埃塞俄比亞，秋官、阿姐、阿倫同葛民輝我哋都聯絡緊，另外公司好多藝員好有興趣參與，我哋好多謝佢哋支持，但目前好多嘢未落實，暫時唔方便透露。我可以講嘅係，志偉初步答應去汶萊，預計下個月出發，下個月15號係汶萊皇帝生日，我哋好希望拍攝到佢慶祝生日嘅情況，同埋有可能入皇宮拍攝，同汶萊皇帝做訪問。另外，我哋都會介紹當地皇帝點樣揀妃嬪，以及皇帝用嚟招待外賓嘅酒店，介紹吓酒池肉林嘅一面。」
阿旺興奮
「最想去啲文明古國」
年前曾有不少女星被傳到汶萊賣淫，問到無綫會否就有關傳聞深入探討？鄧婉媚笑說：「我哋就係為咗避免敏感，所以專登唔搵女藝人去。」至於蔡少芬以色列之行，原來最初定於去年農曆新年出發，結果因當地政局動盪取消，鄧婉媚說：「我哋本來改為今年七、八月出發，但最近以巴又開戰，去唔去得成都未知。」
對於有機會參與新一輯《向世界出發》，郭晉安昨日在電話中興奮地說：「我覺得係近期一個拍得好出色嘅節目，拍得好有深度。詳情公司仲未通知我，我最想去埃及呢啲文明古國。」林敏驄則說：「我係有同公司提過，但去邊度就唔知道，我最想去印度搵大寶法王，聽講佢法力好勁。」
另一方面，無綫有意找秋官到內地探訪，但秋官卻對歐洲較有興趣，他昨日在電話中說：「無綫係有初步同我接觸，但未知檔期就唔就到，我都幾想去威尼斯睇吓，坐住船聽吓歌。威尼斯每年都有個嘉年華，啲人都會戴住面具出街，聽聞啲人戴住面具係方便偷情，咁我去就梗係唔會偷情啦，我只係會睇人點偷啫。」
採訪：戴彩煥
