最近黃淑儀（Gigi）返咗嚟香港，暫別溫哥華與一群子女，目的無非為拍攝無綫劇集《肥田喜事》及第三輯《吾湯吾水》，咪以為Gigi姐淨係識整湯水，涼拌菜都好耍家，頭炮示範嘅呢款三色蛋，我都覺得非常易整，賣相仲十足雲石咁靚㖭！
記者：陳慧茵
攝影：譚盈傑
場地：BuiltIN
鄧萃雯溫哥華搵食
Gigi姐不諱言唔少菜式都係從朋友、廚師身上偷師，「好似今次嘅三色蛋，其實係我一個台灣朋友整畀我食，自己返屋企咪再試吓改良吓囉。」原裝版本用豬油，Gigi姐嫌肥膩，於是改以橄欖油，然後加入烹飪書內公諸同好。
Gigi姐7月會推出第三本烹飪書，主打家鄉菜，慕名上門黐餐的人亦愈來愈多，「之前鄧萃雯去溫哥華都專誠嚟試吓我嘅手勢……見到佢哋食得開心我就滿足㗎喇。」以後途經溫哥華見肚餓識做啦？
材料：鹹蛋（切粒）、皮蛋（切粒）、雞蛋各3隻（拌勻）、清水3湯匙、橄欖油1湯匙
煮法：
1.雞蛋加水及油拌勻，再加鹹蛋及皮蛋粒；
2.倒入已抹油的盛器，大火蒸15分鐘，放涼後切件即可。
