全城世界盃熱，吳光正老闆旗下嘅有線電視獨家全部64場賽事播晒，肯定上客上唔切。八方有日見到有線一個老友，正想恭喜佢，點知佢竟然話俾人夾攻好難頂。
照計鴨寮街啲盜錄機佢哋都預咗啦，最多咪勤啲轉吓訊號，唔使咁愁啫。佢話，鴨寮街雖然有影響，但都有辦法應付，而李家兩父子佢哋就冇乜符。
原來，李家下面有啲屋苑，向住戶提供非常好嘅服務，就係可以睇到中央台，唔止係睇新聞，而係播足球個頻道都有得睇。除咗國語評述有少少唔方便之外，其他冇乜分別，咁仲使乜科水過吳老闆？
至於李二少，佢檔now更加係同有線正面對撼，除咗財經台，聽講個新聞台亦籌備得如火如荼，幾個月後就有嘢睇。咁有線啲電影台已經俾佢搶咗，你話連新聞台呢隻王牌都冇埋，真係唔知點sell。
仲有，二少亦好鍾意足球──唔係踢、而係買。下一屆世界盃，以及新一張英超聯合約，佢都好有興趣，咁兩虎相爭，一定搶到個價天咁高，邊個最後攞到都冇肉食。八方忽然諗，如果將來二少攞到獨家轉播權，你估李系大屋苑住戶仲有冇免費中央台睇呢？
爆料熱線：29290000、27860099
報料傳真：26239278
報料電郵：[email protected]