孫柏文以前喺花旗國讀大學嘅時候，我個妹就喺前宗主國讀書。作為學生，我成日都會反射式咁搵賺錢機會，去幫補我嘅umm…書簿費。嗰陣時，我隻金手指已經有咗雛型，可以耐不耐幫自己搵啲賺錢機會。不過因為學生始終都係資本有限，所以搵嘅賺錢機會，多數都係希望可以刀仔鋸大樹。
大家《金手指》fan屎，如果去過前宗主國嘅都知道，佢哋大街大巷都充斥住合法外圍佬開嘅投注站。呢啲投注站嘅經營者，唔似我哋特區咁，一個壟斷企業做晒。正當競爭壓力咁大，每一個經營者提供嘅投注選擇，就五花八門、眼花繚亂。作為賭徒，仲可以將投注過關選擇大兜亂，例如，可以買一隻馬獨贏，如果贏咗就過關，去買倫敦會否喺聖誕節當日落雪，再過關落去買前宗主國王子哈利（PrinceHarry）幾時結婚，最後仲可以過關落去買究竟「貓王」皮禮士利（ElvisPresley）會否喺嚟緊嘅一年出現喺哈洛斯百貨公司（Harrod's）飲下午茶。
正因為前宗主國嘅合法外圍佬咁有彈性，我就落order叫我個妹幫我落注。當然，因為我始終係喺花旗國隔岸觀火，所以對於倫敦天氣，或者哈洛斯百貨公司嘅下午茶有冇起死回生嘅作用，都真係唔係好清楚。亦因為呢個原因，所以我多數都係買啲比較大路嘅刀仔鋸大樹投注項目，亦即係賭波。
長買高回報嗰隊贏硬
當年，互聯網先至啱啱起步，所以博彩業都仲未算完全全球一體化。亦即係代表世界上好多投注注碼，會被焗喺本地境內。仲有，每一個受注嘅外圍佬，如果冇參與造馬、造波活動，都只係得一個希望，就係開出來嘅盤，無論最後邊隊贏，都係收注多過派彩。不過，正當注碼被焗喺境內，而一場球賽牽涉到外地球隊，就會出現注碼過份地買咗本地球隊，特別係啲球隊多靚仔，連順嫂都支持嘅「名牌」本地球隊。外圍佬唯一嘅應付方法，就係盡量將本地球隊嘅賠率壓低，減低買佢哋贏嘅投注額，又盡量將外地球隊嘅賠率提高，等多啲買外地球隊贏嘅投注額。
大家都知道，90年代尾嘅前宗主國球壇，都係曼聯（ManchesterUnited）嘅世界。我記得當年，差不多次次曼聯走去踢其他歐洲球隊，去爭歐冠盃，我都會買對家，去享受番鬼佬話齋，牛頭角順嫂提供嘅dumbmoney（特區股市參與者稱為「散戶資金」），托高咗賠率嘅回報。雖然唔係次次都有錢收，不過如果平均注碼，長遠來講都應該有錢贏。
買前宗主國贏上半場
今時今日，博彩業都仲算全球一體化咗，所以要享受到「散戶資金」托高賠率，都差不多要等到四年一次嘅世界盃。當然，又係去買前宗主國嘅對家。仲要畀大家一個貼士，前宗主國球隊裏面嘅球員，大多數都係喺英超聯踢波，英超聯出咗名辛苦，所以到季尾嘅國家級足球比賽，前宗主國嘅表現都係非常一般。
大家可以留意前宗主國多數都係喺上半場係威係勢，去到下半場就因為開始體力下降，所以畀人㩒住嚟打，02年世界盃、04年歐洲國家盃都係咁樣出局。大家不妨下次落注買前宗主國對手嘅時候，買前宗主國贏上半場，不過全場就打和或者輸波。
最後，經過好多年之後，我個妹爆咗出來，佢幫我落注只有幾個月，最後因為我每一次贏錢，都會全部買落下一場，佢心諗我橫掂遲早都會有一場輸，所以最後尾佢受晒我啲注，亦所以贏咗我好多錢。佢爆出來嘅一刻，我就問佢：「如果我一路贏咁點算？」我個妹就答我：「啊哥，你個花名叫做『黑仔文』，你邊度有咁好彩！哈、哈！」
孫柏文