世界盃開始咗幾日，唔少勁旅已經亮相，啲議員大彈英格蘭表現。高達話，英軍竟然淨係靠個烏龍波贏，奧雲又冇狀態，高治隻香雞腳又唔踢得。就連唔睇波嘅吳靄儀都話，啲英國報紙都話，英軍表現衰到貼地，已經無可再衰，證明英國佬係好理性，一啲都唔會護短！
長毛話，德國同英格蘭都發揮唔到，艾歷臣啲策略就係咁衰，贏一球就死守到完場，點都好，英軍德軍已有三分在手，以後兩場就好打好多，特別係啲失咗分嘅球隊，因為佢哋焗住要搶攻，到時就有好多空間畀英格蘭同德國。
今屆好多場喺凌晨三點踢，高達特登買咗部DVD錄影機錄波，留番第二日睇，噚日就錄咗科特迪瓦對阿根廷。啲行家一問佢賽果，高達即刻大嗌話：「錄咗場波未睇，千祈唔好講邊隊贏！」
傳真︰2623-9278
電郵︰[email protected]