近日熱爆的《美女廚房》，除咗有明星廚煮番幾味之外，每集都有一個美少女嚟挑戰，今次除了請咗噚日上電視嘅Emily，我仲請埋第1集嘅翻版栢芝阿詩同第2集嘅翻版黎姿Kathy嚟個大比試，師傅仲特別揀咗近日肥美嘅桂花魚做材料，等佢哋可以炮製出幾款唔同嘅菜式。
記者：曾靜茵
攝影：林栢鈞
示範：嚼江南陳偉明師傅及居靜波師傅
地址：荃灣中國染廠大廈地下G05（26280299）
背後禪師 陳偉明師傅
有20多年入廚經驗的陳師傅，最拿手就係煮上海菜，去年所創製的「魚香肉丸」更獲得2005美食之最大賞的銀獎，當中以蝦肉和豬肉製成丸狀，沾上切碎的炸魚皮再酥炸過後，撒上炸過的松子、豆酥、蒜酥等，以增加多種不同層次口感。
金魚餃90℃熱水搓粉
聞煮價：$15/4人
需時：40分鐘
要由一塊圓形嘅粉糰變成一條金魚，就算有師傅從旁指點都尚有難度，因為魚中嘅餡料要適中，加上細緻嘅手工先可以整出一條完美嘅金魚餃。
有料到
餡料：桂花魚肉3両、芫荽（切粒）少許、中芹（切粒）1両、青豆數粒
粉皮：紅蘿蔔2両、麵粉半斤、水200毫升
調味：鹽1/4茶匙、胡椒粉、雞粉各少許、蛋白1隻、生粉1/2茶匙
聞煮法
1.麵粉加水搓成粉糰，加紅蘿蔔茸搓勻。魚調味後加入芫荽及中芹粒；
2.將粉糰壓平，向後摺1/3，餡料放入中間，然後對摺，再摺出魚鰭；
3.將頭部屈成眼睛，放入青豆，再將尾部反起，摺出花紋成魚尾，隔水蒸5分鐘即成。
聞煮貼士
應以90℃熱水開麵粉，咁先會令開出嘅麵糰更易定形。
香荽莧菜桂魚羹清香啖啖肉
聞煮價：$40/4人
需時：90分鐘
阿詩強項係甜品，今次叫佢整魚就嗌晒救命，所以佢就用咗簡單嘅方法──煲！將魚肉起骨與豆腐放入魚湯，啖啖肉，加埋莧菜粒入口清香。
有料到
桂花魚1條、豆腐1磚（切粒）、芫荽（切粒）1両、莧菜（切粒）2両、冬菇（切粒）3両、蛋白2隻、薑汁少許、生粉2茶匙
調味：鹽1/3茶匙、胡椒1/3茶匙、花雕酒1茶匙、蛋白半茶匙
聞煮法
1.豆腐及冬菇先飛水。將魚起骨，放入滾水中熬1小時，撈起魚湯備用；
2.魚肉切粒、調味後拖油，放入豆腐及冬菇輕炒，倒入魚湯煲滾；
3.加入薑汁，以生粉埋芡後，加入蛋白及芫荽、莧菜粒即成。
聞煮貼士
芫荽同莧菜粒要最後落湯，如果唔係好易變黑。
回鍋桂花魚脆口唔油膩
聞煮價：$45/4人
需時：30分鐘
Emily細個已經跟住媽咪入廚房煮嘢食，今次將最拿手嘅回鍋煮法用喺魚片上，炸過嘅魚片食落脆口，比普通肥豬肉少咗份油膩感。最重要係將魚片炸到乾身，令醬汁撈勻後亦能保持脆口感。
有料到
桂花魚1條、尖椒1隻、青蒜1條、燈籠椒8隻、紅椒1/4個
調味：雞蛋1隻、鹽、生粉各少許
醬汁：豆瓣醬3茶匙、糖2茶匙、茄汁、磨豉醬、生抽、辣油各1茶匙、麻油少許
聞煮法
1.將魚去骨切片，以鹽調味；
2.將魚片撲上生粉、雞蛋後炸至乾身撈起；
3.爆香其他材料，再加入醬汁輕煮，最後放入魚片兜勻後即成。
聞煮貼士
魚一定要炸得夠乾身先至可以保持脆感，另外芡汁亦唔可以煮得太耐，以免太稠。
松鼠糖醋桂花魚酸甜開胃
聞煮價：$45/4人
需時：60分鐘
上一集見過Kathy整生炒骨都知佢煮嘢有番咁上下，今次佢就將一條桂花魚變為松鼠！原來扭扭魚身，將魚頭反轉，魚鰭位置就立即變成一對耳朵，維肖維妙！配合酸酸甜甜嘅糖醋汁，開胃呀！
有料到
桂花魚1條、紅椒（切粒）、青椒（切粒）、松子各半両、洋葱粒少許
調味：鹽、胡椒各1/3茶匙、花雕酒1茶匙
芡汁：茄汁6湯匙、山楂1両、冰糖6湯匙、白醋4湯匙、生粉2湯匙、鹽少許
聞煮法
1.將原條魚去皮，開邊𠝹花，保留魚頭；
2.將魚身扭成辮狀，調味後沾上生粉，放入80℃油溫炸12-15分鐘；
3.輕爆紅椒、青椒及洋葱粒，倒入芡汁輕煮，再淋上魚身，撒上松子即成。
聞煮貼士
切魚頭時保留魚鰭用嚟扮松鼠頭，炸時夾起尾部可令魚身變得彎曲。