中大醫學院慶祝成立二十五周年，當然唔少得梁智鴻醫生夫婦，何解？皆因梁醫生既係行會成員又係醫管局前主席，佢太太喺瑪麗醫院做部門阿頭，以前同霍泰輝院長做過同事合作過。
梁醫生𠵱家做咗安老事務委員會主席，講老人問題佢最大興趣。至於霍院長專長小兒科，都係好玩得之人，啲校友笑因為醫啲肥胖兒童連自己都瘦身成功，仲有相為證，佢一啲都唔嬲。
反而佢喺致辭時仲好語重心長話要不斷多謝各方人士嘅支持，唔會親疏有別，佢嗰四種感謝捐助人士都好有趣：
四天感謝：春天、夏天、秋天、冬天。
三天感謝：冷天、熱天、不冷不熱天。
兩天感謝：晴天、陰天
一天感謝：每一天。
即係話，佢天天都感謝大家，希望大家天天都捐助中大醫學院啦。
傳真︰2623-9278
電郵︰[email protected]