肥龍（圖）等咗好耐先有得放大假，所以煲呔一由雲南返港，佢第二日就飛走，十九號先上班，放足一個星期有多。
八方問佢位新聞秘書關太，肥龍去咗邊？係咪同老婆飛咗去日本聽歌劇？關太就猛話自己唔知老細去咗邊，咁又真係好難令人相信，話晒肥龍同關太一向老友；唔講就真喇！
至於關太，就同老公去咗歐洲玩。老細放假，新秘當然都唞唞；肥龍由上任第一日，就講明只做兩年，中間仲話過可能提早今年底收工，以便幫煲呔競選。
點知最近講講吓，又話煲呔一定贏，所以唔使佢老哥先辭職，安安樂樂做到明年六月三十號就大功告成。咁當然事情仲有發展，就係話北京覺得肥龍好掂，可以穩住公務員隊伍，對外又搞得掂班地產商，於是又話叫佢做多兩年先走，到時鬍鬚曾學師成功，最佳時間接佢個CS位做，之後可以繼承煲呔嘅特首位置。
煲呔算盤打得好響，但係唔知過唔過到肥龍老婆嗰關，許太一定唔放人，否則邊個陪佢去聽歌劇？
傳真︰2623-9278
電郵︰[email protected]