有獲公司聘請的待業年輕球迷為看世界盃列強爭霸，不惜放棄期待已久的就業機會。參加展翅計劃的豪仔說：「有間快餐店話請我，但係每晚八點幾先收得工，世界盃九點就開波，驚趕唔切睇波，咪決定暫時唔做住囉！」
見人輸到要按樓
2003年皇馬訪港，當年會考的豪仔無心備戰，跑到酒店守候球星，結果會考零分收場。同年馬會賭波合法化，他未成年，但放學後仍千方百計與同學溜入投注站落注。「阿爸一直都有賭馬仔，不過自從賭波合法化之後，佢就連波都賭埋。但係佢就唔會分析球隊嘅傷兵變化形勢，經常會問我嘅意見。」
豪仔經常到北角的茶餐廳睇波，見有「艇仔」收外圍波。「見有個阿叔，輸到要按樓。有個後生仔，欠十幾萬外圍數，仲想一場買8萬蚊翻身，連外圍都唔受佢玩，叫佢搵大耳窿借錢還債。」
豪仔自認賭波很有分寸，但今個季球還是全部輸光。他坦言，父親做裝修，母親有兼職，自己是家中獨子，食住無憂；在世界盃後，能找到月入4,000元的工作，已心滿意足。
記者 林社炳