公民黨黨主席關信基真係退而不休，星期六八方喺中大聯合書院撞到佢，佢話逢假期都會返大學辦吓公睇吓書，而噚日佢又去咗又一村達之路嘅陳樹渠中學，出席中學生畢業禮（圖）。
八方諗關主席梗係認為民主自由嘅種子要自細培養，所以中學生都要多聽多講。煲呔政府呢輪日日放風，話同公民黨最唔啱傾，關信基話冇乜所謂，反正政府做得啱，佢會讚，唔啱就彈同反對，原則不變。
好似添馬艦起政府總部，公民黨就覺得係勞民傷財，冇乜必要；「呢啲係影響數以十年、以至百年嘅大事，唔啱就一定要出聲。」關主席尤其擔心係政府將來會重建舊政府總部，你話喺下亞厘畢道起間國金咁高嘅建築物幾難睇，所以佢哋覺得要三思，唔使急。
至於特區政府有乜嘢值得讚？關主席話咪拒絕減稅囉，因為唔好以為一年有盈餘就太高興，沙士同亞洲金融風暴教訓好深刻，庫房好容易冇銀，到時喊都無謂。
區民傑攝
傳真︰2623-9278
電郵︰[email protected]