世界盃開波，每晚落吧睇波喪劈，啤酒飲得多男生怕有啤酒肚，Cocktail飲得多女生會飲到口寡寡。有無新驚喜先？有，原來酒吧可以搬入廚房，Cocktail可以當飯食！Cocktail入饌新搞作，將開波飲酒Happyhour推前至Dinnertime，晚飯時間酒精已經開始喺血液內流動，唔怕醉就嚟喇。
記者︰劉昱蘭
攝影︰譚盈傑
模特兒︰Tania、Wysam（Salvador）
Hanvana：古巴風情雞尾酒菜
飲純酒，配乜最佳佐酒食物可以好講究，有人話燒鵝髀送啤酒最正，我就話燒鵝肥淋淋盞食到成肚油！Cocktail直接入饌就唔使煩，因為Cocktail一早已經Mix埋幾類酒同生果，齋飲味道已經好好味，配任何食物都咁正。南美國家愛Cocktail又愛生果，古巴餐廳「Havana」就用PinaColada、MangoDaiquiri、MaiTai、RumRunner同Mojito煮出新美味菜式，勁有新鮮感。
入饌Cocktail（左起）
a.PinaColada：用菠蘿、椰子、冧酒溝成，味道清新，配濃味海鮮至合拍。
b.MaiTai：鮮橙、青檸加冧酒溝成，生果味仲好Fruity，多數配藍莓生果汁煮鴨胸。
c.RumRunner：黑莓甜酒加冧酒，酒精仲甜味重，煮出嚟嘅餸飄出強烈酒味。
d.Mojito：薄荷梳打溝青檸、冧酒，同樣唔算Perfectmatch，反而配菜仲正。
e.MangoDaiquiri：古巴人最愛飲Cocktail之一，本身有青檸、冧汁，加入芒果汁就更啱女仔口味。
莫吉托燒羊架$178
Mojito（d）入饌，無用酒但有薄荷汁焗新西蘭羊架，淡淡薄荷味自羊肉透出，配菜用酒浸過，香口好重冧酒味，記得食埋個配菜咪走寶。
芒果黛克麗伴雞柳$78
MangoDaiquiri入饌，雞柳用甜冧酒醃製，點芝麻再炸香脆可口，淋菠蘿芒果汁加芒果粒，炸雞食落會Juicy啲，冧酒味淡淡，以芒果味為主的頭盤幾開胃。
甜酒劍魚串$158
RumRunner（c）入饌，冧酒、蒜茸及番荽醃劍魚，魚塊及紅甜椒串起煎，加味道酸咪咪最夾海鮮嘅藍莓沙沙醬，淋一淋南美香蕉汁，第一啖咬落去真係好刺激，醋味酒味好搶。咬咬吓無咁多汁，反而覺得唔夠喉。
鳳梨園海鮮盤$96
PinaColada（a）入饌，椰殼上的椰子甜忌廉最正，面頭隻蝦鋪滿Cream勁醒神。海鮮用檸檬汁、橙汁、冧酒及芫荽醃個零鐘好入味，嗒真會食到生果香，鮮味得嚟唔會寡。
馬太鴨$168
MaiTai（b）入饌，鴨先用香橙甜冧酒加青檸汁浸過夜，然後慢煎面層多油嘅鴨皮，再加果仁和鴨胸肉一齊入焗爐，伴薯仔及四季豆。入口首有脆口覺感，腍身鴨胸嗒落有果味酒清香。
Havana（25459966）
地址︰中環蘇豪區伊利近街35號
營業時間：12:00nn-12:00mn
酩霞飛：靚酒煮幾味
「酩霞飛」有名你叫，酒當然係佢哋強項喇，餐牌有一「酒香入饌」系列，望落菜名好似無乜特別，但試過味道又確實唔錯。呢間舖主打上海菜，不過會用墨西哥龍舌蘭等外國酒入饌，好有西式Fusionfeel。
鵝肝醬砵酒醬豬頸肉$76
用西方葡萄酒之一嘅砵酒入饌，濃味帶甜，先炒香豬頸和翠玉瓜，加入味濃鵝肝醬、砵酒就搞掂，簡單一炒已經夠惹味。
龍舌蘭橙花肋排$76
龍舌蘭酒入饌，肋排汁用鮮橙汁和龍舌蘭酒調製成，肋排則用玫瑰露醃製4小時。師傅落橙汁個比例多過龍舌蘭，因後者有41%酒精，酒味太烈會無咁好食。
玫瑰露川汁龍蝦$178
玫瑰露入饌，龍蝦入口好辣好勁酒味，唔覺意成嚿擺入口即刻打個突。川汁用玫瑰露、酒釀和豆瓣醬煮成，烈味過後咬到龍蝦肉夠爽口好正，點辣都要食多嚿先夠喉。
酩霞飛（27822200）
地址︰旺角朗豪坊13樓6號舖
營業時間：11:30am-11:30pm（一至五）、11:30am-12:30mn（六、日）
