世界盃熱潮無處不在,唔少外資大行亦出研究報告及畀貼士,而且十分認真,似乎唔只要做股神,連波神都要做埋。高盛貼巴西為奪標大熱門,次熱門為英格蘭。UBS的貼士更詳盡:1.16強為A組的德國及波蘭、B組的英格蘭和瑞典、C組的阿根廷和荷蘭、D組的墨西哥和葡萄牙、E組的意大利和捷克、F組的巴西和克羅地亞、G組的法國和瑞士及H組的西班牙和烏克蘭。
2.8強上線由西德對阿根廷,意大利對法國;下線就由荷蘭對英國,巴西對西班牙。
3.4強上線由阿根廷對意大利;下線由荷蘭對巴西。
4.決賽由意大利對巴西,冠軍係意大利!
趙飛雲亦有趁高興賭吓世界盃,不過賽果就冇想像中咁正路,首日的心水波蘭輸到眼光光,次日的瑞典打和亦累到同英格蘭條2串1斷纜,好彩中番阿根廷波膽先至冇咁傷,股市難搵食,但賭波亦一樣唔易贏。
恒指再考驗15400
言歸正傳講番股市,美股上周四微穿250日線後急彈,先低後高的走勢在日線圖出現長十字,難免令人憧憬會否是見底的「早晨之星」,可惜周五杜指反覆下跌46點,收10891,回頭再跌穿250日線的機會又大增。
港股上周五見外圍回穩,亦回升178點,收15628。上周相對美股及日股,港股毋須跌至250日線已反彈,走勢其實略佳,不過今日就未必能持續反彈,滙控(005)上周五在美國預託證收133.20元,較香港低收1元。另一隻重磅股中移動(941)亦跌0.62元,而其他大籃籌亦遍普下跌,看來恒指會再考驗近期低位15400水平,甚至要試埋250日線(現處15269)的支持力。
趙飛雲