各位中環人要注意，假日成為菲傭、印傭聚腳地嘅中環滙豐銀行總行地下，喺6月中至10月期間會改建；華華以為佢哋係唔想菲傭聚集，不過，睇真啲佢哋嘅設計圖片，又唔似會封大堂唔畀人用。
查實菲傭喺嗰度聚會都好多年，加上集團業務遍及全球，話唔定好多菲傭都係客戶，冇理由得失佢哋啫。不過，最終都要睇吓第時廣場變成點先知。
整項工程為期約20個星期，預期今年10月底完成。滙豐話，新大堂由現時3個電梯入口大堂擴充，用強化玻璃同金屬架構建造，並將增設一個中央訪客接待處及其他設施。工程進行期間，會加設臨時接待處幫訪客登記。原來嘅3個電梯大堂就會設置隧道式入口，畀職員及訪客使用。同時仲會喺地面廣場東面（即大堂對面）增設自動櫃員機，取代廣場西面嘅機。