曾經三奪世界盃的勁旅意大利，將於明日凌晨三時，與來自非洲的加納展開世界盃E組分組賽。意大利除實力強外，隊中球星包括托迪和恩沙基等靚仔如雲，牌面比首次打入決賽周的加納高，難怪迷得袁詠儀（靚靚）暈陀陀，但張智霖（ChiLam）卻與老婆靚靚唱反調，踩意國球員老化，捧加納可爆冷贏波。 採訪：朱倬誼、陳月媚、戴彩煥
撐意大利
鄧麗欣 恩沙基靚仔
我對足球唔熟，但都識意大利，因為多靚仔球星，踢前鋒嘅恩沙基靚仔喇，仲有托迪，意大利係有實力嘅球隊，喺國際球壇咁出名，梗支持意大利。
楊思琦 未聽過加納
近日開工成日聽到人講世界盃，所以自己都要惡補一吓，唔係真係好難同人溝通。對於意大利對加納呢場波，我未聽過加納呢個名，所以都係會捧意大利，而且聽人講恩沙基同托迪都係好波之人，呢場波應該意大利勝出。
袁詠儀 昅仔兼睇波
加納呢個球隊嘅名，真係第一次聽到，所以我對呢隊球隊都唔係咁認識，所以我都係捧番自己比較認識嘅意大利隊場，而且我捧意大利隊其中一個原因，當然係因呢隊有唔少靚仔球星啦！好似迪比亞路、托迪同恩沙基都幾型，睇佢哋踢波，係一件賞心悅目嘅事。
黃德斌 球星有腳法
意大利都係我欣賞嘅國家球隊之一，比較熟悉同欣賞嘅球員係托迪，其實佢哋成隊波都係屬於世界級球星，好多個球員都靚仔又有腳法，波衫又靚，如果有時間我都會捧佢哋場，相信嚟緊場波，佢哋勝算都好大。
撐加納
方力申 非洲球隊強
我估和波，意大利踢聯賽時好多醜聞，話祖雲達斯踢假波，呢啲係會有影響，呢兩日世界盃開始咗，睇到啲非洲球隊好犀利，千里達都迫和瑞典，所以絕對不容忽視，雖然意大利有大賽經驗，但加納後防能力強，意大利未必話入就入，𠵱家踢波體力化咗，分分鐘爆冷㗎。
張智霖 球員夠年輕
可能好多人會覺得意大利會稍勝一籌，但我之前睇咗幾場賽事，發現以黑人為主的球隊表現一啲都唔輸蝕，好似科特迪瓦表現幾好，所以今次我睇好加納，畢竟意大利隊球員開始老化，足球始終係一項好靠體力嘅運動。
