華華早兩日喺酒會遇到港交所新任董事鄭慕智，佢早排被傳為分拆後嘅證監會非執行主席熱門人選。不過鄭律師好謙咁話，自己其實好蠢鈍，未夠資格勝任，而且要放低自己多年經營嘅律師行心血，始終有啲唔捨得，都係唔好預佢。睇見鄭律師講得咁決絕，睇嚟佢真係想安心做港交所董事。
咁邊個至係真命天子呢？數吓數吓，人選真係買少見少。不過，嚟緊嘅星期三立法會大會就會正式通過分拆證監會主席嘅條例草案，各位唔使等好耐就知邊個坐正。
雖然舊年一直盛傳嘅大熱門李業廣，曾經公開話過香港空氣太差影響健康，要減少公職，無意接掌證監。但現時正是朝廷用人之際，只要法案順利通過，Charles未必會再推，睇怕揹住氧氣樽去中環返工都冇所謂。
閂埋門一家人
其實，證監分拆總裁與主席嘅建議，本來就係Charles向老董提出，後來證監全球招聘現任總裁，結果揀個唔會做主席嘅英國人韋先生，呢個人選亦係由Charles親自挑選，都好有遠見。咁將來由兩個胡關李羅出身嘅人，一個掌港交所（夏佳理），一個掌證監，兩個機構一定合作良好，唔再爭權，有乜事閂埋門自己搞掂，和諧過和諧啦。
李華華
讀者如有任何意見或報料，歡迎發送電郵至[email protected]。
