冬蟲夏草據講有神奇作用，補腎補氣，長期病患者服之可以養生，老人家服之可以補氣定神，一般人服之，可加強抗病能力。講就係咁講嘞，左丁山一路半信半疑，坊間大把冬蟲夏草成藥出售，每日吞一兩粒即可。不過一個正宗嘅服用方法就係著名藥材行教落，中醫話OK嘅方法：十至十五條冬蟲夏草，四両瘦肉，十粒龍眼肉，四塊淮山片放落燉盅，燉四小時，一路加溫水落煲，免致水乾爆煲。燉好後，飲水，渣可食。
一位老人家日日飲一盅，飲咗一個月，甚為見效！面色好晒，腦筋精靈咗㖭，左丁山親眼目睹，冇法子唔信，於是介紹呢個方法畀公關Y。公關Y照辦煮碗，到名店E記買一両裝（有一百五十條）冬蟲夏草，每日燉十五條。公關Y做慣事務管理，對一切行事程序都細心檢查，每次親自放冬蟲夏草落燉盅，要睇住十五條都浮上水面，先至放心，如是者食到最後十五條，十四條浮在裝滿水嘅燉盅上，但有一條始終沉在底，公關Y疑心大起，用刀切開，一睇內裏竟藏咗一條鉛筆芯咁細嘅鉛條！
E記與一間國貨公司Y記賣冬蟲夏草，當然係內地產品，入貨時會用金屬探測器仄過，防止內地奸商放置鉛條入冬蟲夏草內，藉以增加重量，賣貴啲。但係百密偶有一疏，未必每一條冬蟲夏草都測試過嘅，公關Y唔好彩，居然買中一條含鉛嘅。
內地商人為咗賺錢，乜都敢做。一次Y老闆曾經同左丁山講，佢公司用金屬探測捉到唔少「冒重貨」，後來啲新貨竟然「條條過關」，佢思疑之下，叫夥計切開幾十條睇真啲，發覺入面藏咗一啲紙條，增加重量。一啲中國人係好聰明，但可惜用諸於弄虛作假方面，枉費腦筋，枉花精神，兼且傷害到同胞，𠵱家啲冬蟲夏草，普通料啫，閒閒哋要千幾蚊一両，正宗頂級西藏貨，要四千蚊以上先至買到一両，故此有奸商呃秤！老友藥王T就話咁鬼麻煩，食冬蟲夏草丸就算啦！