煲呔真係好運氣，本來啲傳媒日夜追查佢八九年參加《民主歌聲獻中華》嘅證據，點知世界盃一開波，大家對佢都失晒興趣。
八方同一位高官傾開偈，佢都話啲傳媒追都無謂，當年香港政府都亂晒大龍，公務員都係血肉之軀，見到啲同胞喺北京被軍隊射殺，點會唔傷心，所以六四之後，佢哋都試過出席各類嘅追悼會，甚至臂纏黑紗返工都有之。
當然大家都知道華叔唔係要翻乜嘢舊賬，更加唔係好似有啲人咁話想搞「白色恐怖」，須知出席民主愛國活動者皆是華叔同路中人，世上哪有人將同志摒出大門外，只係華叔做人有碗話碗，如實道出，可能係時間敏感啲，但係煲呔真係唔使咁驚青，一味想同北京交心，都要諗吓香港人點諗㗎，否則就會同香港人愈走愈遠。
翻舊賬同秋後算賬係共產黨嘅強項，香港人都領過嘢，點會有人贊成咁做呢？而最重要係呢個「賬」係港人認同係啱嘅，唔係點會有百萬人上街，比反23條更多。
傳真︰2623-9278
電郵︰[email protected]