影音試團：Plasma高清反擊　化身世盃判官

睇咗世盃揭幕戰，電視台啲二流評述真係信唔過！德國第一個攻門射上網頂喪嗌入波、哥斯達尼加2個入球都有越位之嫌又講到唔清唔楚，谷鬼氣，都係眼睇為實。日立今個星期將推出全港首部1080iPlasma，除正式加入1080i高清對應，向LCDTV再度宣戰外，連平時睇開嘅電視節目，都可谷上1,080線畫質。有咗佢，乜嘢越位、手球全部難逃法眼！

記者：朱崇德
攝影：陳盛臣

買LCDTV，好多人心目中都有「頂級」品牌，對於Plasma大家可能未必咁認識；現時Plasma市場基本以日立、Panasonic同Pioneer鼎足三立，不過今次日立在香港率先推出對應FullHD的Plasma，可以話行先了一大步！至於Panel尺寸方面，「抵買」起跳點亦唔似LCDTV嘅32"咁縮骨，日立推出嘅FullHD機42PD8900TA，就以42"為起點。

■以遙控作電動調校Plasma的擺放角度，暫時是日立獨玩功能。

■以睇高清為賣點，所以連HDMI插位都預留2個。

■其他色差、視頻、S-Video及VGA電腦輸入埠，亦唔少得。

■Plasma兩邊各有5個喇叭單元，隱藏式設計，令機身更美觀。

■機面冇按鍵，全部收晒去機側，透出一股簡約味道。

發揮Plasma優點

一般人心目中比較追捧LCDTV畫質，原因係鍾情佢Panel密度高，感覺畫質特別細膩；不過日立呢部42PD8900TA，採用1,024×1,080超高解像Panel，加上Plasma高速畫面冇殘影、色彩富層次等特性，以畫論畫，係好多LCDTV都比唔上！
大家可能會提出HD應為1,920×1,080的疑問；就數字上看是對，不過就顯示影像特性嚟講，垂直線數是以「一整行」輸出的，1,920還是1,024，可能點數上的粗幼有別，但以一個整體看，對畫質不會有太大影響；更重要的水平線則行足1,080，意即將1,024Pixels嘅橫線，由上至下掃1,080次，所以畫質一樣咁實淨清晰！

686億　勁好色

42PD8900TA在影像處理器上，將一直好評的PICTUREMASTER核心升級為HD版本，方便更高影像數據處理。對比度亦是現時日立同系機中最高的4,000:1，可顯示色域達686億種顏色，所以影像感覺層次更分明又逼真。Panel光亮度亦使用了現時最高階的1,400cd/m2，加上全機由日本裝嵌製造，質素更有保證。
其他周邊都算落足心機，左右喇叭合共使用10個單元設計，其中2個更為重低音喇叭，整體音效輸出達36W！附設SD卡槽，方便大家將數碼相機嘅相片插喺電視度播放。

畫質測試
夠色又立體

播放高清影碟完全唔窒，食得起1080i。最重要係色彩漸變順滑，影像極富立體感，而且微粒明顯較以往Plasma幼細。