孫柏文今日想同大家講希臘神話兼夾教大家英文，不過千祈唔好誤會，我唔係想講濠賭概念股，唔係教大家乜嘢叫做banker、player同naturalnine。我今日想講嘅係一個航海家經過一個海峽嘅故事。呢個海峽有兩隻怪物守護，一邊岸一隻，不過因為個海峽非常狹窄，避得開一隻就被第二隻搞。
第一隻怪物就係一隻寄居於海底嘅怪物，佢會產生一啲可以吞噬船隻嘅漩渦，大家可以叫佢做「怪物C」（Charybdis）。第二隻怪物就係一隻穩坐岸邊，有好多頭、好多臂嘅怪物，佢係一隻憤世嫉俗嘅怪物，見到有船經過，就會捉船上嘅船員嚟食，大家可以叫呢隻怪物做「怪物S」（Scylla）。
伯南克駕駛美金號
個希臘神話故事，係講一個船長面對住要通過呢個海峽嘅挑戰，所作出嘅取捨。長話短說，個船長後尾決定，為保船隻整體安全，犧牲船員咁走埋怪物S嗰邊。作出決定之前，個船長絕對唔知道會犧牲幾多個船員，甚至可能會犧牲所有船員，不過為保船隻整體安全，也迫不得已選擇走埋怪物S嗰邊。自此之後，喺西方世界裏面，如果一個人面對着呢個一定要揀，不過難以取捨嘅情況，佢就可以話身處於「betweenScyllaandCharybdis」。
不過喺西方世界裏面，亦都太多唔識希臘神話嘅人，所以「betweenScyllaandCharybdis」亦變成「betweenarockandahardplace」。大家睇到呢度，可能會問：「世界股市，風起雲湧，金銀銅鐵，大上大落，金手指居然，篤教英文？」其實，我今日同大家講呢個希臘神話故事，係因為我哋正正活喺故事當中。船長就係伯南克，佢指揮嘅船就係U.S.S.YanquiDinero（美金號），我哋就係船員。
大家可能會加問：「咁怪物C同怪物S又係乜？點解U.S.S.美金會進入海峽嗰度？」首先，美金號迫進「海峽」嘅原因，就係格林斯潘嘅聯儲局多年來濫發鈔票。怪物C就係通貨膨脹之路，如果通貨膨脹冇節制，有危機感嘅人亦會棄美金呢隻船，U.S.S.美金亦會因失去購買力而沉沒。至於怪物S就係加息之路，隻船整體應該會被保全，不過通過「海峽」之後，所有船上面參與世界股市、花旗國樓市買賣嘅船員，就唔知有幾多會俾怪物S捉咗食落肚。
有乜感想歡迎留言
原本全世界都以為伯南克會將美金號駛進通貨膨脹之路，不過，佢老人家上個禮拜唔知道黐咗邊條線，由一個非常恐懼通縮嘅人，變成一個「93年vintage嘅朱鎔基總理」。就算經濟崩潰、樓市爆煲、股市直仆，都要金銀銅鐵油價跌、跌、跌，因為佢忽然驚醒，發覺原材料係花旗國經濟有通貨膨脹壓力嘅「劊子手」，而唔係聯儲局多年來濫發鈔票引發。
上個禮拜初，我都仲估伯南克唔會篤爆世界股市，不過佢𠵱家向原材料宣戰，世界股民亦變成花旗國軍隊所稱嘅collateraldamage，即係我哋特區人民話嘅「炮灰」。我喺幾個禮拜前，話過幫大家耐唔耐篤個叫做「世界股市死得未？」嘅表出嚟，畀大家睇吓世界主要股市升市大趨勢變成跌市未。因為大批股市指數跌穿200日平均線嘅時候，就係互相確認跌市大趨勢成型。大家睇完「世界股市死得未？」個表，睇完裏面上次同今次嘅分別後，唔知有乜感想？大家可以上《蘋果日報》網站，嚟到《金手指》一頁最下面，「我的意見」嗰度留言。
孫柏文