小初愛炒股，亦鍾意睇足球，所以唔會錯過世界盃任何一場波，未來一段日子，難免掛住兩個黑眼圈炒股票，好彩呢輪市況麻麻，唔會太傷神。
經紀黃問小初夠唔夠膽買冠君（2778）博反彈？佢話冠君自上市以來，股價一直潛水，而摩根大通同埋美林一直在護航接貨，估計佢哋接到咁上下，隨時來個絕地反擊都唔定。
冠君喺5月底以5.10元招股上市，雖然相比其他房地產信託基金，冠君嗰幢花旗銀行廣場位於中環，地點最靚，但可惜人人話佢喺派息上做手腳，利用利率掉期及大股東暫時唔收息等夾硬推高派息比率，加上市場氣氛逆轉，所以掛牌以來股價走勢一浪低於一浪，最低見過3.725元，上周五回升1.92％，收3.975元。
經紀黃話，以現價計，冠君的派息比率7厘有多，如果花旗銀行廣場出租率真係有改善，而呎租又加價嘅話，隨時係炒上藉口。
慕容小初