資深股票客戶謝太：喂？邊個呀？我揸緊車。
經紀Karen：謝太，Karen呀。有冇時間講兩句？
謝太：有，一定有！不過要快，其實我等你打電話畀我好耐啦。個市係咁跌，真係唔知點算好？你話𠵱家好唔好趁低吸納？
Karen：放咗三個禮拜假去讀書考試，冇同你傾偈，都估唔到個市變得咁快。個市實在仲有太多好有信心嘅人，個個覺得今次只係短線調整，就算做咗大閘蟹，都覺得好快會升番。除非有多啲人投降、離場，否則個市應該未跌完。
或跌落8000點
謝太：未跌完？睇電視、報紙，好多評論員都話個市已經到技術關口。如果個市再跌，咪會跌穿呢啲技術關口？
Karen：係，我都驚會。由97年到𠵱家，恒生指數一路都喺一個範圍之內郁。17000點附近作為高位，8000點附近作為低位，我最驚就係個市啱啱試完17000點，會再一次跌落去8000點。最弊就係個市絕對有條件，喺不久嘅將來再一次跌落去8000點。因為大家都唔知新任聯儲局局長伯南克係唔係已經完全失控。前個禮拜尾，美國都算權威嘅財經雜誌《Barron's》做咗個訪問，訪問咗當今世上對原材料最大好友嘅JimRogers。JimRogers被問到對伯南克嘅感受時，就好唔畀面話伯南克係個教授，完全唔識市場運作，死硬。可能就係咁，伯南克就上個禮拜話要打壓原材料價格急升所引致嘅通脹。即係話加息、加息、再加息。雖然我知道我咁講會少好多佣金，不過謝太，我諗你都係呢排揸住啲現金好，唔好入市住，等個市清晰啲先至算。
謝太：OK，橫掂年初已經賺咗咁多，我又買咗恒指認沽證，𠵱家就當放假。不過就算呢排唔玩股票，你都要搵我傾吓偈先至得。
Karen：（笑着）不如就下個禮拜食Lunch？