個個都喺度講世界盃，華華見到陸叔陳永陸，諗住都同佢講吓波經，點知佢劈頭就話，我唔睇波㗎！咁呢一頭半個月，咪少咗好多話題？佢話冇緊要喎，佢除咗唔好波之外，連馬都唔賭，所以一早已經「冇咗好多男人嘅話題」。
早前同屋企人飛去美國，出席寶貝女碩士畢業禮嘅陸叔話，人人去晒睇波，佢咪乘機睇實個市，揀番啲心水。咁又係，人人顧住個球市，話唔定佢可以喺股市度撈番筆意外之財。呢排雖則個市跌番啲，都係應咗「五窮六絕」，咁幾時係入貨嘅時間呢？佢話：「7月頭，世界盃尾段嗰陣啦。」
唔睇波唔賭馬，男人話題少咗，但講到扮靚KeepFit呢啲女人話題，陸叔反而好鬼雀躍，話自己係呢大半年都有做通淋巴，水腫嘅情況改善咗，又習慣少食多餐，啲膽固醇高、煎炸熱氣嘅嘢，就更加唔會掂，𠵱家成個人精神晒。