前晚世界盃B組賽事英格蘭對巴拉圭，香港有不少英格蘭球迷，當中李克勤便是箇中的死硬派分子，他前晚在觀塘出席睇波活動，由於現場直播有線賽事，身為無綫契仔的他，避嫌沒有觀看，但當得知英格蘭開齋入了一球時，即忘形欲上前觀看，後來發覺身份尷尬才縮沙返回座位，十分搞笑。
李克勤前晚在觀塘apm出席睇世界盃宣傳活動時，先在現場唱出無綫世界盃主題曲《我著10號》，還即席表演球技。球賽在晚上9點開始，現場正播映有線電視的直播足球節目，身為無綫契仔的克勤在球賽開波前已避回後台，但後台仍有一部小型電視機，不過克勤十分克制，全程躲在後台角落位，未敢觀看電視機一眼。
「都係避而不談」
但上半場一開始，巴拉圭球員便烏龍地頂入自己龍門，克勤的助手即興奮大叫「入咗喇！」登時令到英格蘭球迷李克勤即彈起身，欲上前看電視入球，當他踏前了兩步卻發覺身旁站滿了記者，他即抑壓着自己的興奮心情，轉身返回座位說：「嘩！好大鑊，身份尷尬。」場面十分搞笑。
身為標準足球迷的克勤也是無綫世界盃的主持，被問及世界盃期間會觀看哪個電視台，他即無奈地笑說：「你哋就寫李克勤避而不談啦，唔方便講，我收人錢，梗係要講嗰個台嘅嘢。」做主持不能看直播，那麼是否會錯過多場賽事而要錄起回家欣賞，他十分醒目地答：「都係避而不談，我鍾意精華片段，呢個係TVB員工嘅標準答案，你問何麗全，都係咁答。」
「出線唔係問題」
此外，克勤前晚到無綫主持《頂Cup好波》節目時，談到英格蘭險勝巴拉圭一事，他說：「一額汗，不過，英格蘭一向係咁，遇強愈強，大家唔使擔心，出線應該唔係問題，最緊要唔好對住德國，因為主場之利好犀利。我呢啲支持英格蘭，睇波唔係講過程，係講贏波！」
採訪：楊潔雯、李珮洳
攝影：陳俊強、陳順禎
