姓名：Shopping精
性別：女
年齡：年年24歲
興趣：行街買嘢、吃喝玩樂、做高溫瑜伽
同事暉仔鍾意send醫貓畀人，除咗搞笑短片，好多係消費資訊；我唔會全部都信，因為啲醫貓有唔少流料。（除咗我send畀大家嗰啲！heee:P）等我踢爆兩個流料醫貓啦。
早前我解咗個新奇士密碼，今次又解「麥當勞茄汁密碼」，網上流傳話麥當勞茄汁包裝上印有A1至A12編號，代表茄汁嘅酸甜度，A12係最酸，A1最甜；唔少朋友都因為咁，喺麥當奴買嘢食都叫人哋畀多幾包茄汁佢哋揀。
不過，麥當勞回覆我查詢話，呢個只係謠傳，茄汁包裝上面啲數字，只代表生產編號，而所有茄汁都一樣味㗎。咁又係，如果包包唔同味，咪好浪費資源。
「膠水樽致癌」亂噏
另一個電郵傳聞，就係每隔一年半載就會聽到嘅「膠水樽唔好循環再用」，話膠樽含有「己二酸二辛酯」（DEHA）嘅致癌物質，第一次用冇問題，但循環再用，致癌物會喺清洗同翻用過程中，喺食水溶解，再進入人體；嘩，撻埋科學用語，真係言之鑿鑿喎。
之但係，我喺消委會做嘅老友Connie話，呢啲醫貓只係亂噏，佢話DEHA唔係致癌物質，而且DEHA係用嚟提高塑膠產品嘅可塑性，例如令保鮮紙柔軟、黏貼，但膠水樽根本唔使用DEHA：「循環再用水樽唔單止唔會致癌，反而好環保㖭，不過記得洗乾淨同整乾啲，唔好畀細菌滋生。」
所以話，大家收到流傳嘅電郵，唔好全部信以為真呀。:P
逢周一刊出