上個星期三，四叔李兆基喺自己地頭四季酒店做東，擺咗3圍，宴請前新鴻基證券一班舊手足，事後有人爆料，話四叔當晚好開心，開金口唱歌仔。華華問飯局其中一個座上客，萬信金融董事總經理許照中，究竟四叔唱咩歌；佢話飯局係真，但四叔唱歌就係流料喇！
講完個飯局，許照中自爆話，近排搵緊一張陳年舊相，應該都幾值錢，乜相咁巴閉呢？原來係一張佢同巴西球王比利嘅合照！佢話70年嗰時，足總請咗比利嚟香港，喺京華酒樓設宴，當時佢喺《華僑日報》做記者，適逢其會去採訪，梗要同球王影張合照啦，不過之後搬過幾次屋，唔知張相喺邊，家吓都未搵番。
許照中話自己唔係超級波友，但世界盃期間，都會捱眼瞓睇波，因為仔女鍾意睇，咁咪陪佢哋睇囉，冇計啦，唔係你估廿四孝老竇易做㗎。