中大醫學院培養出不少杏林人才，前晚銀禧晚宴，高朋滿座。特別值得六任院長數十老師及二千幾校友驕傲嘅，係仲保得住個招牌，唔使跟人改姓李。
不過佢哋仍然好受姓李嘅人影響，因為中大醫學院同李國章又真係好難分得開，想當年阿瑟王連喺鐵皮屋開工，人工唔見一大截都肯由英國回歸，就注定中大同佢有不解之緣。有中大畢業生上台棟篤笑，話李國章認真唔話得，不但投身醫學院，見到中大醫學院成個二奶仔咁款，就義不容辭去做中大校長，同佢哋爭取更多資源；後來為咗要照顧埋學生嘅仔女教育，仲毅然加入政府做教統局局長，幫小學生同中學生；一切都係為咗醫學院嘅學生，真係好偉大，佢哋仲做咗一張幻燈片，即場投映，係李局長切燒豬嘅相，上面三隻大字：「殺無赦」。
阿瑟王被班同學讚到飄飄然；不過，原來佢做老師時，都係殺人不眨眼。班醫生話，要考試及格一定要有料，否則就殺無赦，肥佬係等閒事。八方都一早風聞李局長厲害，中大班教授封佢做沙王，有佢講冇你講。但係前晚晚宴，班畢咗業嘅大國手都學佢一樣幽默，佢哋唔少都結晒婚，已生兒育女，於是帶晒細路上台，大家問起當年上李局長堂有冇打機，個個都話冇；因為李教授講書好動聽，唔會一心二用；鬼咩，李國章咁惡，唔驚肥佬乎。
聲稱不能一身二用
李國章十足個大細路，你嬲佢都無謂。佢嗰晚壓軸上台演講，真情流露，又乘機喺度諷刺對面海間大學，話人哋啲教授唔識得欣賞中大同學上課活躍嘅一面，真係乜都敢同你講笑。佢當日答班尊貴議員自己一心二用，認真為老不尊，俾八方笑佢係金庸子弟，成個周伯通，原來佢以前真係寫咗一篇文講周伯通，有時間要拎嚟拜讀一吓。
醫學院慶祝成立二十五周年，李局長好似回到老家一樣咁雀躍，八方問佢既然成世為中大醫學院不遺餘力，不如再捱義氣更上一層樓，做埋政務司司長，接肥龍棒，咁一定可以幫中大爭取更多資源。點知局長反應好大，話大家乜都預佢一份，CS又係佢，CE又係佢，佢點可以一身二用？局長咁醒，有乜唔得，咪先做CS，再做CE囉。點知坐同一張枱嘅新聞秘書阿May話，局長想多做一屆，局長夫人都未必批准，何況仲要話要做得更高級。
傳真︰2623-9278
電郵︰[email protected]