古巨基日前在東京原宿為親自設計的Kubi×BeamsT限量版慈善Tee看樣辦，甚為滿意，他此行又與BeamsT副社長和工作人員吃沖繩料理，還被日版陳伶俐指他長得像V6隊員岡田准一，又殷勤款待他，對基仔甚為嗒糖。 東京直擊
古巨基歌影雙棲，又是漫畫家，近日再撈過界做時裝設計師，為日本潮流品牌BeamsT設計T恤，收益撥捐紅十字會。
好友冇面畀
基仔創作的漫畫公仔Kubi獲該品牌老闆垂青，並邀他設計T恤，雙方一拍即合，日前基仔更特地到東京原宿的BeamsT總部與品牌總監永井秀二開會、看樣辦和傾談T恤的後期製作。
基仔對製成品十分滿意，他說：「我以前都幫Kubi設計過T恤喺漫畫展賣，但當時仲有好多其他產品，冇今次咁專注做件衫，仲係同品牌crossover，感覺似個正式嘅設計師，頭先總監話我知，件衫賣幾多錢，聽到自己嘅產品用日圓嚟標價，覺得好得意。」
這件KubiTee限量200件，7月左右於港、日兩地發售，日本售價4,880日圓，香港則定價459元。基仔說：「件衫得一隻色，就係Kubi嘅橙色，遲吓佢哋會送番一件畀我。」原來基仔不少好友得悉此事後，紛紛託他預先訂購，卻被拒絕，他說：「因為件衫數量有限，我哋開會時傾過，最好都係等公開發售時落舖頭買，幫到人又有衫着就最好。」
勁擦沖繩菜
開完會後，基仔逛了專門店，之後BeamsT副社長遠藤惠司及一班職員便一盡地主之誼，請基仔大吃沖繩料理，其中貌似陳伶俐的女職員告訴基仔，他很像日本組合V6的成員岡田准一，雖然基仔不知道岡田准一長相如何，但也微笑道謝，該女職員還主動要求跟基仔合照，影相時又忽然面紅，用餐時又坐在他身旁，似乎甚對他嗒糖，基仔說：「我嚟到日本話晒都係客，人哋都係禮貌啫。」
採訪、攝影：蔡如玉
