上周五晚，英法德3地股市平均漲幅1.72%，走勢算靚。但去到美國，杜指埋單仍然唔見0.43%。
油價升，而伯南克本周二晚又開口講嘢，炒家心掛掛，杜指全周唔見300點以上。
全球注視嘅美股唔郁得，其他股市都好難有大運行。港股上上落落，兩日之間波幅300點閒過立秋，賭輪注碼要輕，無謂搽白花油。
中石油C輪3632：中石油（857）連跌4日，1周埋單跌幅7.3%，收7.60元。今年2月同3月最低7.25/7.30元（8月最高9.35元），再見低位估計會撐得住，呢個位嘅C輪，值得博吓，留意2200。隻輪7月尾到期，輪價81仙，溢價1.2%，槓桿率9.4倍（有效8.1倍），引伸波幅26.9%。
如果想賭「狼」啲，則揀3632，贏輸會大好多。3632喺10月初到期，輪價47仙，溢價9.9%，槓桿率16.2倍（有效7.4倍），引伸波幅35.7%。上周五有249球轉手，買賣易，贏輸計數亦好易。
聯通C輪9846：聯通（762）呢排相對硬淨，上周收6.75元，1周總結只係唔見斗零，幾間大行去買。唔使心急，有平貨至考慮，C輪敲定9846。
隻輪12月初夠鐘，輪價1.09元，溢價5.8%，槓桿率6.2倍（有效4.6倍），引伸波幅34.9%。
章盛