黃德斌中學畢業後，眼前有不少機會，也做過不少工作，但他偏偏選擇投考藝員訓練班，當年父親勸他不如去考警察，但他卻有自己的想法：「雖然冇去考警察，但戲中都可以扮警察，細細個已經覺得錢係好重要，搵到錢可以養起成家人，之後20幾歲有機會做model，收入都唔錯，不過覺得都係唔長遠，所以最後去咗考訓練班。」
黃德斌天生高大有型，但當年只做過短暫模特兒，之後便投考無綫第15期藝員訓練班，89年畢業後，黃德斌一直飾演路人甲乙丙，由於多年未有發展機會，於是轉做幕後，雖然也試過往電影圈闖，可惜仍然離不開行行企企的角色。
擺街邊檔賣Tee
原來，黃德斌93年曾經心灰意冷，為了眼前一口飯，決定找朋友搭路改行做小販，於街邊擺檔賣T恤，他說：「嗰時冇工開，但係我都要食飯㗎，為咗搵食乜都要做啦，咁我又唔係做壞事，諗番起嗰時走鬼都好辛苦，又試過撞到朋友，仲開口叫朋友幫襯吓，總之為咗生活冇辦法啦！」
直至97年，黃德斌再度回歸電視圈，他說：「當年終於可以等到有個有對白嘅角色，就係喺《真情》裏面飾演『越南』，嗰時我仲以為自己終於可以出名，之後我唔係冇拍劇，但全部押後出街，好多人都以為我冇喺呢行，當時心情自然會大起大落，因為眼前都睇唔到將來，當時我曾經懷疑過會唔會有抑鬱病？好彩冇事。不過好多訓練班出嚟嘅演員，都會有類似經歷，條路只不過係自己嘅選擇，當中一定有喜怒哀樂甜酸苦，喺每個階段都會發生，我已經比好多人幸運，今日已經值得感恩，所以以前嘅事根本不值一提。」
