論呢一年最出位嘅本地製作人，怕且蕭定一認阿二，冇人敢認第一。蕭公子嘅緋聞多過唔少明星㗎，除咗傳得最耐嘅李彩華（Rain）外，連王秀琳（Mango）同李蘢怡（Tiffany）都先後同佢扯上關係，但關仁就諗極唔明，點解其貌不揚嘅蕭定一竟然可以做到女人湯圓嘅？就早幾日之嘛，關仁就撞見蕭定一喺中環蘭桂坊一拖二，當中有女伴仲主動向佢投懷送抱㖭！
兩女扮好姊妹
日前凌晨近兩點，飛甩Rain去偷歡嘅蕭定一，同兩位長髮嬌娃以及一位男伴喺蘭桂坊雲咸街夜遊，四人行到安蘭街一間新場時，蕭定一就企正門口打電話，身邊兩位女伴就互搭膊頭，幾浮誇咁扮好姊妹，齊齊隨人龍排隊等入場。
等候期間，着露背裝嘅女伴突然自動黐喺蕭定一隔籬，一手勾實佢膊頭，勾勾吓仲突然轉埋身，胸貼對方背部，一邊請佢食波餅、一邊勾埋一嚿煙韌入場，望埋真係好親熱，如果Rain睇見呢一幕，肯定嬲到眼火爆。
Textby關仁
