黃耀明至型黑超
「呢個係ChristianDior贊助我嘅，但我本身都好鍾意太陽眼鏡，呢樣係好好嘅飾物。戴眼鏡唔單止係靚嘅問題，有時如果唔夠瞓，精神唔係咁好，戴咗會覺得型晒，而且會多好多新鮮感。我除咗儲太陽眼鏡外，我都好鍾意平光鏡，只要係款好嘅，我都會儲㗎。」
方大同古董魔戒
「其實我本身好少戴飾物，只係有時用嚟襯吓衫，而呢隻戒指就係我好耐之前喺美國一間專賣古董首飾嘅舖頭買嘅，我好多時都會戴住，呢隻戒指係1847年製造，我覺得個款式簡單得嚟好特別，我買嘅時候，佢已經氧化咗變成綠色，我自己用布抹番靚佢。」
鄭嘉穎街頭皮繩
「皮繩頸飾係喺日本買嘅，普通街頭文化嘅飾物，日本有好多，我見價錢平平哋，又易襯衫，所以每次去日本都會買好多返嚟，我覺得飾物唔一定要名牌，最緊要合眼緣，好似我手上呢條A&F皮手帶都唔係好貴，但男仔會比較適合，感覺斯文又有啲粗獷。」
王敏德紀念鏈墜
「我自己本身唔係好鍾意戴首飾，而手上呢幾條膠手帶就係一個慈善機構送畀我嘅，因為我係佢哋機構嘅大使，平時我最多都係戴手錶。另外我戴緊呢條直升機鏈墜，係老婆送畀我嘅結婚周年禮物，所以我成日都要戴住佢。」
