萬眾期待的世界盃終於開鑼，全球球迷心情都相當興奮，由本報娛樂版舉辦的「最想同邊個女星睇波」選舉經過一輪網上投票後，已有結果。選舉共有2,228位網民投票，結果網民最想跟有愛美神之稱的黎姿睇波，其次順序為葉璇、鍾欣桐、容祖兒及鄧麗欣。本報娛樂版已積極安排上榜女星跟20名幸運網友一起觀賞世界盃球賽，詳情容後公布。而多位上榜女星亦揀出心目中「最想陪睇波的男人」。
No.1黎姿 342票
父女互切磋
黎姿得知自己成為冠軍，開心地說：「好開心，其實都覺得好得意，因為自己從來都唔鍾意睇波，亦冇諗過啲網民會選自己，覺得啲網民應該投啲鍾意睇波嘅女星。若果要搵男伴陪我睇波，我就會搵爹哋，我爹哋唔係好睇波，但我就想藉睇波同家人共敍天倫，多啲時間見面。」
No.2葉璇 241票
家英好識波
「我平時好少睇波，但四年一度嘅盛事，如果有時間我都會睇，但我嘅足球常識真係唔多。我諗我最想搵羅家英一齊陪我睇，我知道家英哥對足球認識好深，有乜問題，相信家英哥都會識得解答我，而且仲會解釋得好詳細。」
No.3鍾欣桐 225票
No.4容祖兒 133票
No.5鄧麗欣 116票
細哨夠搞笑
「我揀朗拿甸奴，因為我唔係好識睇波，咁佢可以一路同我睇波一路解釋吓啲賽例畀我聽，而且我覺得佢個樣幾好笑，睇波之餘可以望吓佢，都係一件幾有娛樂性嘅事。」
No.6蔡卓妍 115票
No.7楊千嬅 101票
No.8張文慈 86票
愛型男畢仔
「我最想揀係畢彼特（BradPitt），原因好簡單，睇波呢樣咁精采嘅活動，最好有個靚仔喺身邊，佢靚仔有型，總之有佢喺身邊睇波，就係一件賞心樂事。」
No.9陳慧琳 85票
搵阿叔提神
「呢期阿叔林尚義咁紅，睇波就梗係搵阿叔陪，而且阿叔講波一致叫好，自己唔識睇波，有個咁叻嘅人喺身邊就唔怕會睇到瞓着啦。本身鍾意英格蘭隊，因為多靚仔，而且英國啲男仔畀人感覺運動掂又夠gentleman，呢樣嘢真係夠晒煞食。」
No.10應采兒 80票
EminemRap球賽
「我就想搵美國hiphop歌手Eminem陪我，因為我想佢一路喺我身邊將場賽事rap出嚟，我覺得好有新意，人哋講波，佢就rap，加上佢好靚仔，我又鍾意聽hiphop，Eminem係不二之選。」
No.11梁詠琪 70票
No.12官恩娜 58票
阿叔任旁述
「我會揀阿叔林尚義陪我睇波，因為佢講埋今屆就退休，如果搵佢做我私人旁述，就特別矜貴，加上呢期佢咁hit，有佢喺身邊睇波都會零舍開心同投入。」
No.13鍾嘉欣 54票
偏愛韓劇男
「如果要我揀，我想揀一個韓國演員同我一齊睇波，佢就係拍《最後之舞》個男主角池城，最近我煲緊呢套劇，覺得個男主角好穩重，好有內涵，我好鍾意佢，如果可以同佢一齊睇波就好啦！」
No.14Race（2R）53票
陪父享天倫
「我會揀爹哋陪我睇，因為佢好鍾意睇波，我同家姐鍾意睇波都係因為佢，雖然佢冇專業評述咁專業，但對我嚟講已好足夠，我就同媽咪一樣都係捧巴西嘅。」
No.15薛凱琪 52票
黐實方大同
「我會搵同公司嘅周國賢、方大同一齊睇波，起碼大家同聲同氣，一齊出去睇波亦唔怕傳緋聞。不過我就唔係太鍾意睇波，有佢哋兩個男仔陪我睇，可以即刻有人同我解波，但係我最驚就係因為我成日煩住佢哋，搞到佢哋見到我都怕。」
No.16胡杏兒 44票
No.17麥家琪 42票
No.18廖碧兒 39票
No.19衞蘭 39票
壽仔無代溝
「我會搵中田英壽，因為佢夠靚仔，不過我都係最近先留意佢，之前睇過佢啲訪問，覺得佢講嘢好慢同好gentleman，感覺好cool，而且佢打波都好叻，雖然溝通上有困難，但係我媽咪講日文好叻，如果真係都可以叫媽咪教我幾句嘛，而且佢都識講英文啦。」
No.20佘詩曼 35票
晨曦隊老友
「我會揀晨曦足球隊，因為我同佢哋成班都好friend，之前都試過一次唱唱吓K，有人搬個大電視入房，就係咁一邊唱K一邊睇波，個氣氛好好，一齊笑一齊叫，雖然我唔知邊個打邊個，但我都識睇邊個好波，成班人一齊睇，梗係開心！」
No.21李蘢怡 30票
No.22衞詩 27票
No.23周慧敏 25票
No.24朱茵 22票
No.24鄭融 22票
冧老闆父子
「我會搵老闆鄒世龍陪我，因為老闆個仔好鍾意我，雖然佢只係得小學二年級，但我出席活動時佢都會支持我，我仲可以去埋老闆屋企睇波，設備一定好完善，睇起波嚟都投入啲。自己都識睇波，最鍾意巴西嘅朗拿甸奴，因為佢真係好可愛。」
No.24楊思琦 22票
八哥狗跟身
「我一定會搵我隻狗八哥仔懞懞豬陪我睇波，因為佢好黐身，無論我喺邊度佢都會跟住我，仲會喺我腳邊瞓覺，有佢陪我一定會睇得好開心。其實自己唔係好識足球，如果個波成日逗留喺中場就好悶，最鍾意睇個波靠近龍門嗰陣，好鬼刺激。」
No.27張栢芝 19票
No.28樂基兒 16票
No.28楊愛瑾 16票
No.30舒淇 8票
No.31莫文蔚 7票
No.32徐子淇 4票
總票數：2228票
資料來源：壹蘋果網絡
